विश्वव्यापी मोबिलिटी र शहरी सेवा प्लेटफर्म, इनड्राइभले नेपालमा ‘राइड टु सपोर्ट’ अभियान सुरु गरेको छ। यो अभियान स्थानीय समुदायलाई प्रत्यक्ष रूपमा लाभ पुर्याउने उद्देश्यले प्राथमिक विद्यालयहरूमा खेलकुद संरचना र सुविधा सुधारमा केन्द्रित रहेको बताएको छ।
समुदाय–संचालित यो पहल अन्तर्गत, इनड्राइभले मे महिनाभरि नेपालभर संचालित प्रत्येक तेस्रो राइडबाट संकलित भाडाको १० प्रतिशत रकम स्थानीय प्राथमिक विद्यालयहरूमा खेल मैदानको मर्मत र खेलकुद सामग्री वितरणमा खर्च गर्नेछ । यस पहलमार्फत बास्केटबल, ब्याडमिन्टन, र फुटसलजस्ता खेलहरूका लागि आवश्यक किटहरू प्रदान गरिनेछ, जसले विद्यार्थीहरूको शारीरिक विकास र सामाजिक सहभागिता अभिवृद्धि गर्न मद्दत गर्ने उल्लेख छ।
यस अभियानअन्तर्गत, प्रत्येक तेस्रो राइडका साथ प्रयोगकर्ताहरूले आफूलाई मात्र गन्तव्यमा पुर्याउने होइन, बरु समाजलाई अघि बढाउने एउटा सशक्त कदम पनि चालिरहेका हुन्छन्। उनीहरूको सानो योगदानले स्थानीय विद्यालयहरूका खेलमैदानहरू सुधार गर्ने कार्यमा सहयोग पुग्छ, जसले बालबालिकाहरूलाई खेलकुदको माध्यमबाट आत्मविश्वास, अनुशासन र नेतृत्व सीप विकास गर्न प्रेरित गर्दछ। ‘राइड टु सपोर्ट‘ अभियानमार्फत इनड्राइभले सामाजिक उत्तरदायित्वलाई व्यवहारमा उतार्दै, बालबालिका र युवापुस्तालाई उज्वल भविष्यतर्फ उत्सुक गराउने प्रयास गरिरहेको छ । यस अभियानले यात्रालाई मात्र होइन, समावेशी विकासको दिशामा अगाडि बढ्ने यात्रा बनाएको छ।
इनड्राइभकी एपीएसी कम्युनिकेसन लीड पावित नन्द आनन्दले भन्नुभयो, “हामी दृढतापूर्वक विश्वास गर्छौं कि ‘राइड टु सपोर्ट‘ जस्ता उद्देश्य–केन्द्रित पहलहरूले समुदायलाई सकारात्मक रूपमा परिचालन गर्न सहयोग पुर्याउँछ । यस्ता पहलहरू मार्फत हामी हाम्रो सामाजिक प्रभावलाई अझ सशक्त बनाउँदै लैजान सक्छौं। यसले अरूलाई पनि सामाजिक न्याय र समानताको यात्रामा सहभागी हुन उत्प्रेरित गर्छ। हरेक राइड केवल गन्तव्यसम्मको यात्रा मात्र होइन, यो एक सामाजिक परिवर्तनतर्फको सार्थक पाइला हो । मे महिनामा गरिएको प्रत्येक राइडले विद्यार्थीहरूका लागि सुरक्षित, रमाइलो र आवश्यक संरचनासहितको स्थान निर्माणमा सहयोग पुर्याउनेछ, जहाँ उनीहरूले खेल्न, सिक्न र आत्मविश्वासका साथ बढ्न सकून्।”
