काठमाडौं । सरकारले संचालन गर्दै आएको ‘स्टार्टअप कर्जा कार्यक्रम’मा यस वर्ष १० हजार २४४ वटा आवेदन परेको छ । प्रतिष्ठानका कार्यकारी निर्देशक उमेशकुमार गुप्ताका अनुसार यो संख्या गत वर्षको तुलनामा दोब्बर बढी हो ।
उनका अनुसार यसपटक ८ हजार २०३ अनलाइन र २ हजार ४१ आफैं कार्यालयमा आएर दर्ता गर्नुभएको निवेदन प्राप्त भएका छन् । “यस वर्ष आवेदनमा निकै उत्साहजनक देखिएको छ । अब मूल्याङ्कन समितिले कार्यविधिअनुसार सबै निवेदन अध्ययन गर्नेछ र छनोट सूची तयार पार्नेछ ।”
गत आर्थिक वर्ष स्टार्टअप कर्जाका लागि करिब ५ हजार आवेदन परेका थिए । तीमध्ये विभिन्न चरण पार गरि ६६१ जनाले कर्जा प्राप्त गरी सकेका छन ।
गुप्ताका अनुसार अहिल सम्म कर्जा असुलीमा कुनै समस्या देखिएको छैन । “करिब २ करोड ९० लाख रुपैयाँ फिर्ता आइसकेको छ र एक जनाले पनि नतिरेको अवस्था नरहेको बताउनु भयो ।
कुन क्षेत्रमा बढी आवेदन ?
पछिल्ला वर्षहरूमा जस्तै यसपटक पनि कृषि क्षेत्रमा सबैभन्दा धेरै आवेदन परेको अनुमान गरिएको छ ।
स्टार्टअप कर्जाका लागि कृषि, वन र उत्पादनमूलक क्षेत्र मुख्य शाखा मानिन्छ । साथै सूचना–प्रविधि, पर्यटन, पूर्वाधार तथा परम्परागत क्षेत्रमा आधारित १९ प्रकारका उद्यम समेटिएका छन् ।
स्टार्टअप उद्यम भनेको के ?
सरकारको परिभाषाअनुसार स्टार्टअप उद्यमले नयाँ सोच र नवप्रवर्तन प्रयोग गरेर वस्तु वा सेवा उत्पादन गर्ने व्यवसायलाई जनाउँछ ।
स्टार्टअप उद्यमका मुख्य विशेषताहरू :
१ व्यवसाय दर्ता भएको १० वर्ष ननाघेको हुनुपर्ने,
२ प्राइभेट, साझेदारी, कम्पनी वा सहकारी रूपमा दर्ता भएको,
३ कुनै पनि आर्थिक वर्षमा वार्षिक कारोबार १५ करोड ननाघेको,
४ पुरानो व्यवसायलाई टुक्र्याएर बनाएको नभई नयाँ उद्यम भएको,
५ सिर्जनशील र नवीन सोचमा आधारित र द्रुत रुपमा बढ्ने सम्भावना भएको ।
गुप्ताका अनुसार कर्जा पाएका धेरै उद्यमीले राम्रो रोजगारी र उत्पादन वृद्धि गर्न सफल भएका छन् । प्रतिष्ठानले स्टार्टअप उद्यमीलाई कर्जा मात्र होइन, आवश्यक तालिम र सहजीकरण पनि गर्दै आएको छ ।
