काठमाडौं | काठमाडौंमा घर निर्माण फाउण्डेसनले आयोजना गर्न लागेको ‘घर निर्माण फेस्ट २०८२’ को दोस्रो संस्करण औपचारिक रूपमा घोषणा गरिएको छ। शुक्रबार आयोजित पत्रकार सम्मेलनमार्फत आयोजकले फेस्ट आगामी पुस १२ देखि १५ गतेसम्म काठमाडौको भृकुटीमण्डपमा हुने जानकारी दिएको हो। यस फेस्टको उद्देश्य नेपालको निर्माण व्यवसाय क्षेत्रमा आधुनिक प्रविधिको प्रयोगलाई प्रवर्द्धन गर्दै समग्र उद्योगलाई नयाँ उचाइमा लैजाने रहेको फाउण्डेसनले जनाएको छ।
नेपालमा निर्माण तथा व्यावसायिक गतिविधि विस्तार हुँदै गए पनि धेरै ब्रान्डहरूले प्रभावकारी प्रस्तुति, ग्राहकसँग प्रत्यक्ष सम्वन्ध निर्माण, उत्पादनको व्यवस्थित प्रदर्शन तथा समुचित मार्केटिङमा चुनौती झेलिरहेका छन्। यस्ता कमजोरीहरू समाधान गर्न तथा उद्योगलाई एकीकृत प्लेटफर्म प्रदान गर्न फेस्ट आयोजना गरिएको आयोजकको भनाइ छ। दोस्रो संस्करणको फेस्टलाई साधारण मेला मात्र नभई व्यवसायमुखी, अवलोकनमैत्री र परिणाममुखी बनाउन तयारी गरिएको छ।
चार दिनसम्म चल्ने प्रदर्शनीमा करिब २ सय करोड रुपैयाँभन्दा बढीको आर्थिक कारोबार हुने अपेक्षा गरिएको छ। साथै, ४० हजारभन्दा बढी अवलोकनकर्ताले सहभागी भई निर्माणसम्बन्धी नवीनतम प्रविधि, सामग्री र सेवाबारे प्रत्यक्ष रूपमा जानकारी लिने अनुमान छ। कार्यक्रममा अवलोकनकर्ताले निःशुल्क रूपमा इन्जिनियर, आर्किटेक्ट, निर्माण सामग्री विशेषज्ञ तथा उद्योगका अनुभवी व्यक्तिसँग छलफल गर्न पाउने छन्। उनीहरूले घर निर्माणसम्बन्धी जिज्ञासा, सामग्री छनोट, डिजाइन, लागत, गुणस्तर तथा आधुनिक प्रविधिबारे विस्तृत जानकारी प्राप्त गर्न सक्नेछन्।
आयोजकका अनुसार फेस्ट निर्माणजन्य सामग्रीको ब्रान्डिङ, नवप्रवर्तन र व्यवसायिक विस्तारका लागि महत्वपूर्ण साझा मञ्चका रूपमा स्थापित हुने लक्ष्य राखिएको छ।
