सिन्धुपाल्चोक । इन्द्रावती गाउँपालिकास्थित न्यौपानेटार युवा क्लब केही वर्षअघि स्थानीय युवाहरूको निस्वार्थ भावना र समाजप्रतिको जिम्मेवारीबोधका साथ जन्मिएको एक विशुद्ध सेवामूलक संस्था हो। सीमित स्रोत र साधनका बाबजुद समाज परिवर्तनको दृढ अठोट बोकेका युवाहरूको पहलमा स्थापित यो क्लब आज गाउँ–समाजमा सकारात्मक ऊर्जा फैलाउने एक भरोसायोग्य नाम बनेको छ।
क्लबले सामाजिक उत्तरदायित्वलाई केन्द्रमा राख्दै हरेक वर्ष माघे सङ्क्रान्तिको अवसरमा नियमित रक्तदान कार्यक्रम आयोजना गर्दै आएको छ। जीवन बचाउने जस्तो अत्यन्तै संवेदनशील र मानवीय कार्यलाई निरन्तरता दिँदै आएको यस क्लबले स्वास्थ्य सचेतनामा समेत महत्त्वपूर्ण योगदान पुर्याएको छ। यसका साथै नेपाली मौलिक संस्कृति र परम्पराको जगेर्ना गर्न तिहारमा देउसी–भैलो र दशैँमा चिट्ठा कार्यक्रम जस्ता गतिविधिहरू सञ्चालन गरी सामाजिक सद्भाव र एकताको सन्देश फैलाउँदै आएको छ।
गाउँमा आइपर्ने विभिन्न सामाजिक कार्य, विपद् व्यवस्थापन, सहयोग अभियान तथा सामुदायिक गतिविधिहरूमा क्लब सधैँ अग्रपङ्क्तिमा उभिएर निस्वार्थ सेवामा समर्पित छ। युवाहरूबीच आपसी समझदारी, एकता र आत्मीयता अभिवृद्धि गर्ने उद्देश्यले वनभोज (पिकनिक) तथा सामूहिक अन्तर्क्रियाहरू आयोजना गर्दै क्लबले आफ्नो उपस्थितिलाई अझ मजबुत बनाएको छ।
यसका साथै, न्यौपानेटार युवा क्लबको अगुवाइमा ‘न्यौपानेटार बचत समूह’ समेत सञ्चालन हुँदै आएको छ। एक सयभन्दा बढी सदस्यहरू आबद्ध रहेको यस बचत समूहले बचत गर्ने संस्कारको विकास गर्नुका साथै आर्थिक आत्मनिर्भरता र सुरक्षित भविष्यतर्फको मार्ग प्रशस्त गरेको छ। सामूहिक प्रयास, पारदर्शिता र विश्वासमा आधारित यो समूहले गाउँमा सकारात्मक आर्थिक चेतना फैलाउन उल्लेखनीय भूमिका खेलेको छ।
“बचत गर्नुपर्छ, समाजसेवा गर्नुपर्छ, रक्तदान गर्नुपर्छ र संस्कृति जोगाउनुपर्छ” भन्ने पवित्र सोचलाई व्यवहारमा उतार्दै आएको यस क्लबले छोटो समयमै जिल्लास्तरमा समेत आफ्नो छुट्टै पहिचान बनाउन सफल भएको छ। यद्यपि, यति धेरै सकारात्मक कार्यहरू गर्दागर्दै पनि स्थानीय केही व्यक्तिहरूबाट नकारात्मक भ्रम फैलाउने, असहयोग गर्ने र क्लबका गतिविधिलाई गलत ढङ्गले व्याख्या गर्ने प्रवृत्ति देखिनु दु:खद पक्ष हो। रक्तदान जस्तो पवित्र मानवीय कार्यमा समेत अपेक्षाकृत सहयोग नपाउँदा आफूहरूको आत्मबलमा चोट पुगेको क्लबका सदस्यहरूको गुनासो छ।
निस्वार्थ भावना र सेवाको पवित्र उद्देश्यले अघि बढेको न्यौपानेटार युवा क्लबलाई कमजोर पार्ने होइन, बरु अझ सुदृढ बनाउँदै समाज रूपान्तरणमा साथ दिनु आजको आवश्यकता हो। कर्म र सेवामार्फत समाजमा उज्यालो फैलाउँदै आएको यो क्लबले भविष्यमा अझ व्यापक र प्रभावकारी भूमिका निर्वाह गर्ने विश्वास स्थानीयवासीले लिएका छन्।
रक्तदानका तस्बिरहरु
