कारागार कार्यालय धादिङमा एक थुनुवाले झुण्डिएर आत्महत्या गरेका छन् ।
बेनीघाट रोराङ गाउँपालिका–७ चरौंदीका २० वर्षीय विष्णु सुनारले गएराति कारागारको शौचालयमा झुण्डिएर आत्महत्या गरेको कारागार कार्यालय धादिङले जनाएको छ । ती थुनुवा गत ७ गतेदेखि ज्यान मार्ने उद्योगमा पुर्पक्षका लागि थुनामा थिए ।
राति १ बजेतिर शौचालय गएका सुनार लामो समयसम्म पनि नफर्किएपछि ड्युटीमा खटिएका प्रहरीले शौचालयको झ्यालबाट हेर्दा झुण्डिएको अवस्थामा भेटिएको बताइएको छ । मुडा बुन्न प्रयोग हुने डोरीको पासो लगाएर झुण्डिएको अवस्थामा फेला परेको हुन् ।
‘दुई हात लामो डोरीले पासो लगाएर झुण्डिएको अवस्थामा भेटिएको हो । सुनारको शव पोष्टमार्टमका लागि धादिङ अस्पताल पठाइएको छ । घटनाबारे थप अनुसन्धान भइरहेको छ’, कारागार कार्यालय धादिङले उल्लेख गरेको छ ।
