ऊर्जा,जलस्रोत तथा सिन्चाइमन्त्री दीपक खड्काले चीनको राष्ट्रिय ऊर्जा प्रशासन प्रशासक वाङ होङजीसँग द्विपक्षीय भेटवार्ता गर्नुभएको छ।
सांघाई सहयोग संगठन (एससिओ) ऊर्जा मन्त्रीस्तरीय बैठकमा भाग लिन चीन पुग्नुभएका मन्त्री खड्का र चिनियाँ प्रशासक वाङबीच निङबो शहरमा भेट भएको हो ।
भेटमा नेपाल–चीनबीचको ऐतिहासिक र दीर्घकालीन मैत्रीपूर्ण सम्बन्ध,आपसी विश्वास र ऊर्जा क्षेत्रमा सम्भावित सहकार्यका विषयमा छलफल भएको ऊर्जा मन्त्रालयले जनाएको छ ।
चीनका ऊर्जा प्रशासक वाङ होङजीले नेपालको ऊर्जा पूर्वाधार विकासका लागि आवश्यक प्राविधिक तथा वित्तीय सहयोग प्रदान गर्न चीन सरकार पूर्ण रूपमा तयार रहेको स्पष्ट पार्नुभएको छ ।
दुवै पक्षले आगामी दिनमा प्राविधिक टोली आदान–प्रदान गर्दै सहकार्यको व्यावहारिक पक्ष थप संस्थागत बनाउने सहमति गरेको बताइएको छ ।
यता नेपाल भ्रमणमा रहेको चिनियाँ प्रतिनिधिमण्डलले उद्योग मन्त्रालयका वाणिज्य तथा आपूर्ति सचिवसँग भेटवार्ता गरेको छ ।
सिंहदरबारस्थित उद्योग मन्त्रालय पुगेको चिनियाँ कम्युनिष्ट पार्टीको क्वाङतोङ प्रान्तीय कमिटी स्थायी समिति सदस्य तथा क्वाङतोङ वैदेशिक मैत्री संघका सभापति वाङ सी नेतृत्वको टोलीले सचिव रामप्रसाद घिमिरेसँग भेटवार्ता गरेको हो ।
पाँच सदस्यीय टोलीले विभिन्न विषयमा करिब एक घण्टा छलफल गरेको थियोे ।
