नेपाली कांग्रेसका नेता डा. शेखर कोइरालाले एकवर्ष अघि नेकपा एमालेलाई सरकारको नेतृत्व दिनुको कारणबारे प्रश्न गर्नुभएको छ ।
केन्द्रीय कार्यालय सानेपामा आज सोमबारदेखि सुरू भएको केन्द्रीय कार्यसमिति बैठकमा उनले सभापति देउवासामु एमालेलाई सरकारको नेतृत्व दिनुको कारणबारे स्पष्टिकरण माग गर्नुभएको हो ।
‘कांग्रेस–एमाले गठबन्धनको सरकार बन्नुपर्छ भन्ने म नै हुँ । तर, मैले कांग्रेसको नेतृत्वमा सरकार बन्नुपर्छ भनेको थिएँ,’ कोइरालाले भन्नुभयो, ‘के कारणले कांग्रेसले एमालेलाई सत्ताको नेतृत्व दियो ?’
उहाँले सभापति देउवालाई एमालेसँग २०८१ असार १७ गते राति भएको सात बुँदे सहमतिअनुसार संविधान संशोधनको विषयमा भएको प्रगतिबारे पनि जवाफ माग्नुभयो ।
‘यदि संविधान संशोधनका लागि यो सत्ता गठबन्धन हो भने सात बुँदे सहमतिमा लेखिएको संविधान संशोधनको मुद्धा कहाँ पुग्यो ?,’ कोइरालाले भन्नुभयो, ‘सभापतिज्यूले यसको चित्त बुझ्ने जवाफ दिनुपर्छ ।’
उहाले प्रतिनिधिसभा निर्वाचन ०७९ मा नेकपा माओवादी केन्द्रसँग गठबन्धन गरेर अहिले एमालेसँग सहकार्य गरिनुको कारणबारे पनि प्रश्न उठाउनुभयो ।
‘०७९ को संघीय र प्रदेश निर्वाचनमा माओवादीसँग गठबन्धन गरेर निर्वाचनमा गयौँ । अहिले एमालेसँग सरकारमा छौँ,’ नेता कोइरालाले भन्नुभयो, ‘त्यतिबेला के कारणले माओवादीसँग गठबन्धन गर्यौँ र अहिले के कारणले एमालेसँग सत्ता सहकार्य भयो ?’
