एमाले सचिव तथा पूर्वमन्त्री योगेश भट्टराईले डेनिस कम्पनी तथा व्यवसायीहरुलाई नेपालमा लगानी र भ्रमणका लागि आग्रह गर्नुभएको छ ।
लगानीको हिसाबले नेपाल उर्बर र भ्रमणको निम्ति सुन्दर देश भएको भन्दै भट्टराईले द्विपक्षीय सहकार्यले दुई मुलुक बीचको सम्बन्ध थप सुदृढ हुने बताउनुभयो ।
डेनमार्कस्थित नेपाली राजदूतावासले आयोजना गरेको ‘नेपाल व्यापार प्रवद्र्धन’ कार्यक्रममा भट्टराईले स्थानीय व्यवसायीहरूलाई नेपालमा लगानी गर्न आमन्त्रण गर्दै नेपाली आतिथ्यताको अनुभूति लिन पनि अनुरोध गर्नुभयो ।
उहाँले नेपालले डेनमार्कसँग केवल व्यापारिक होइन, मित्रतापूर्ण सम्बन्ध कायम गर्न चाहेको बताउनुभयो ।
डेनमार्कमा रहेका व्यवसायिक अगुवा, नीति निर्माणमा संलग्न व्यक्तित्व र डेनमार्कका अधिकारीहरु उपस्थित रहेको कार्यक्रममा भट्टराईले नेपाल लगानीमैत्री वातावरण बनाउनेतर्फ प्रतिबद्ध रहेको उल्लेख गर्नुभयो ।
भट्टराईले भन्नुभयो, ‘बलियो नीतिगत संरचना, पूर्वाधार सुधार, र स्वच्छ ऊर्जा, पर्यटन, कृषि, डिजिटल नवप्रवर्तन र उत्पादनजस्ता क्षेत्रलाई प्राथमिकता दिइरहेका छौं ।’
नेपालले स्वच्छ ऊर्जा, पर्यटन, कृषि, डिजिटल नवप्रवर्तन र उत्पादन क्षेत्रमा प्राथमिकता दिँदै आएको जानकारी दिँदै दिगो पर्यटन, सांस्कृतिक आदानप्रदान र हवाई सम्पर्क विस्तारमा डेनमार्कसँग सहकार्यको सम्भावना रहेको उहाँको भनाई छ ।
‘समृद्ध नेपाल, सुखी नेपाली’ को लक्ष्य प्राप्तिमा अन्तर्राष्ट्रिय सहयोगको आवश्यकता रहेको उहाँले बताउनुभयो ।
भट्टराईले नेपाल दीर्घकालीन दृष्टिकोण र आपसी लाभको भावना सहित साझेदारीका लागि खुला रहेको बताउनुभयो ।
उहाँले भन्नुभयो ‘हामी डेनमार्कका कम्पनीहरू र संस्थाहरू नेपालमा अवसर खोज्दै गरेको हेर्न चाहन्छौं, केवल बजारको रूपमा होइन, सम्भावनाहरूले भरिएको एक मित्र राष्ट्रको रूपमा ।’
भट्टराईले डेनमार्कले व्यापार वृद्धिमा र द्विपक्षीय सम्बन्ध सुदृढ पार्न गरेको योगदान बारेमा उल्लेख गर्दै नेपालले नवीनता, दिगोपनको अभ्यास, र व्यवसायिक मूल्यहरु खोजिरहेकोमा जोड दिनुभयो ।
डेनमार्कका लागि नेपाली राजदूत सुम्निमा तुलाधरले त्यहाँको नेपाली समुदायलाई राष्ट्र निर्माणमा योगदानका लागि आग्रह गर्नुभएको छ ।
दुई मुलुकबीच सन् १९६७ देखि कूटनीतिक सम्बन्ध कायम रहेको उल्लेख गर्दै डेनमार्कले नेपालमा विभिन्न विकास सम्बन्धी परियोजनाहरूमा सहयोग गरेको विवरण दिइएको छ ।
