नेपाल राष्ट्र बैंक (NRB) ले चालु आर्थिक वर्षको सुरुबाटै तरलता व्यवस्थापनको प्रक्रिया पुनः सक्रिय बनाउँदै आइतबार ५० अर्ब रुपैयाँ बराबरको निक्षेप बोलकबोलमार्फत बजारबाट रकम चुस्ने निर्णय गरेको छ।
राष्ट्र बैंकले यो रकम २८ दिनको अवधिका लागि अवशोषण गर्न निक्षेप बोलकबोलको सूचना सार्वजनिक गरेको हो। यसअघि, गत साता आइतबार ५० अर्ब र बुधबार ८० अर्ब रुपैयाँ निक्षेप बोलकबोलमार्फत अवशोषण गरिएको थियो।
गत दुई आर्थिक वर्षदेखि बैंकिङ प्रणालीमा देखिएको तरलता अधिकतालाई मध्यनजर गर्दै राष्ट्र बैंकले लगातार बजारबाट रकम सोस्ने काम गर्दै आएको छ। चालु वर्षको सुरुवातमा पनि राष्ट्र बैंकले यही रणनीति अँगालेको छ।
निक्षेप बोलकबोलमा प्रतिस्पर्धात्मक बोलपत्रमार्फत ब्याजदर निर्धारण हुने गर्दछ। हाल बैंकहरू कर्जाको माग न्यून र निक्षेप धेरै भएको अवस्थाका कारण तरलता चापमा परेका छन्।
यस कारण बैंकहरूले स्थिर निक्षेप र राष्ट्र बैंकका बोलकबोल योजनामा गरी ७५० अर्ब रुपैयाँभन्दा बढी रकम पार्क गरेका छन्। साउन ९ गतेको तथ्यांकअनुसार मात्र बैंकहरूले लगानीको अवसरको अभावमा राष्ट्र बैंकमा ६७५ अर्ब ३५ करोड रुपैयाँ राखेका छन्।
राष्ट्र बैंकले यस्ता बोलकबोलमार्फत बैंकिङ प्रणालीको सन्तुलन कायम राख्न खोजेको हो, तर लगानी अभावकै कारण बैंकहरू अझै पनि थप रकम राष्ट्र बैंकमा फिर्ता गर्न बाध्य देखिन्छन्।
