नेपालको ऊर्जा र पूर्वाधार क्षेत्रमा लगानी आकर्षित गर्ने प्रयासलाई गम्भीर धक्का पुग्ने खतरा देखाउँदै सोलार पावर प्रोड्युसर्स एसोसिएसन नेपाल (SOPPAN) ले धितोपत्र केन्द्रीय निक्षेप प्रणाली लिमिटेड (CDSC) द्वारा प्रस्तावित ISIN सम्बन्धी नयाँ व्यवस्थाविरुद्ध तत्काल पुनर्विचार गर्न सरकारलाई आग्रह गरेको छ।
CDSC ले प्रारम्भिक सार्वजनिक निष्कासन (IPO) मा जाने कम्पनीहरूको प्रवर्द्धक सेयरलाई नयाँ वर्गमा राख्ने प्रस्ताव ल्याएको छ। यसले प्रवर्द्धक सेयरलाई छुट्टै रूपमा डिम्याट गरी दोस्रो बजारमा कारोबारमा रोक लगाउने व्यवस्था प्रस्ताव गरेको छ। SOPPAN ले यसलाई नेपालको बढ्दो ऊर्जा र पूर्वाधार लगानी वातावरण तथा आर्थिक आकांक्षामाथिको आघात भनेको छ।
SOPPAN का प्रमुख चिन्ताहरू:
- नवीकरणीय ऊर्जामा लगानी जोखिममा
नेपालले २०३५ सम्म २८,५०० मेगावाट नवीकरणीय ऊर्जा उत्पादन गर्ने लक्ष्य लिएको छ। यस्तो अवस्थामा प्रवर्द्धक सेयरको तरलता रोक्नुले दीर्घकालीन तथा जोखिमपूर्ण लगानीलाई निरुत्साहित गर्ने SOPPAN को भनाइ छ। - वैदेशिक लगानी निरुत्साहित
विदेशी लगानीकर्तालाई लाभांश फिर्ता लैजान वा सेयर कारोबार गर्न कठिन बनाउने व्यवस्था सरकारले नै घोषणा गरेको विदेशी लगानी आकर्षण रणनीतिसँग बाझिएको SOPPAN को भनाइ छ। - नीतिगत असंगति र लगानी स्तर घट्ने सम्भावना
सरकार एकातर्फ दिगो विकास लक्ष्य र लगानी प्रवर्द्धनको कुरा गर्छ भने अर्कोतर्फ नियामक निकायहरू विरोधाभासी नीति ल्याइरहेका छन्। SOPPAN ले यसलाई नेपालको लगानी श्रेणीमा गिरावट ल्याउने खालको गम्भीर त्रुटि भएको ठहर गरेको छ। - नीतिगत समन्वयको खाँचो
SOPPAN का अनुसार हाल नियामक निकायहरूबीच ‘बायाँ हातले के गर्दैछ, दायाँलाई थाहा छैन’ भन्ने स्थितिले पूँजी बजार अस्तव्यस्त बनाउँदैछ। SOPPAN ले मन्त्रालयदेखि राष्ट्र बैंक, संसदसम्म नीति समन्वयलाई राष्ट्रिय प्राथमिकतामा राख्न आह्वान गरेको छ। - ‘गोल्डेन गूज’ मार्ने काम नगर्न चेतावनी
ऊर्जा तथा पूर्वाधार क्षेत्रमा दीर्घकालीन, धैर्यशील लगानी चाहिन्छ। SOPPAN को चेतावनी छ—थोरै मुनाफाका लागि यस्ता नीति ल्याउनु भनेको सुन फलाउने हाँस नै मार्ने हो। - राष्ट्रिय लक्ष्य, रोजगारी र जलवायु रणनीतिमा असर
नीतिगत अस्थिरता र लगानीकर्ताको विश्वासमा आँच आउनुले नेपालको दिगो विकास, जलवायु लचिलोपन र आर्थिक वृद्धिमा प्रत्यक्ष प्रभाव पार्ने SOPPAN को ठहर छ। - SOPPAN को अपिल:
- नेपाल सरकार, संसद, अर्थ मन्त्रालय, नेपाल राष्ट्र बैंक, धितोपत्र बोर्ड (SEBON) र CDSC सँग SOPPAN ले हार्दिक अनुरोध गरेको छ कि लगानीमैत्री, पारदर्शी र स्थिर नीति निर्माण गरियोस् ताकि देशको ऊर्जा, पूर्वाधार र जलवायु लक्ष्यहरू साकार गर्न सकियोस्।
