यस वर्षको कक्षा १२ को परीक्षाफल ककनी गाउँपालिकाका लागि अत्यन्तै उत्साहजनक देखिएको छ । गाउँपालिकाका ६ वटा माध्यमिक विद्यालयहरूबाट परीक्षामा सहभागी भएका ११७ विद्यार्थीहरुमध्ये १०४ जनाले सफलता प्राप्त गरेका छन् । यसले गाउँपालिकाको समग्र उत्तीर्ण प्रतिशत ८८.८९ पुर्याएको छ, जुन राष्ट्रिय औसत ६१.१९ प्रतिशतभन्दा धेरै माथि छ ।
उल्लेखनीय कुरा के छ भने, सहभागी विद्यालयमध्ये तीन विद्यालय – शिवालय मावि ककनी-२, मुकुन्देश्वरी मावि ककनी-३, र महेन्द्र मावि ककनी-७-ले शतप्रतिशत नतिजा हासिल गरेका छन् । यसले देखाउँछ कि ककनीका शैक्षिक संस्थाहरू गुणस्तरीय शिक्षाको दिशामा अग्रसर छन् ।
भवानी मावि ककनी-४ ले ९७.७८ प्रतिशत नतिजा ल्याएको छ भने कालिका मावि ककनी-३ ले ६२.५ प्रतिशत, र नवजीवन मावि ककनी-६ ले ३५.७१ प्रतिशत प्राप्त गरेका छन्।
कुल नतिजा हेर्दा, ककनीका विद्यालयहरूले देखाएको प्रदर्शनले स्थानीय शैक्षिक गुणस्तरमा उल्लेखनीय सुधार भएको संकेत दिन्छ । शिक्षक, अभिभावक, र विद्यार्थीहरूको सामूहिक प्रयासले यस सफलताको जग खनेको देखिन्छ ।
