अस्ट्रेलियामा जारी टप इन्ड टी–२० सिरिजमा नेपाल घरेलु टोली नर्दन टेरिटोरी स्ट्राइकसँग ४२ रनले पराजित भएको छ।
नर्दन टेरिटोरीबाट १७८ रनको लक्ष्य पाएको नेपाल २० ओभरमा ८ विकेट गुमाउँदै १३५ रनमा समेटिएको हो। ओपनर नचल्दा नेपालले मध्यम लक्ष्य भेटाउन सकेन। नेपालका ओपनर कुसल भुर्तेल ८ र आसिफ शेख ११ रनमा आउट भए। लोकेश बमले रनको खाता नै खोल्न सकेनन्।
रोहित पौडेल २३ र कुशल मल्ल ३४ रन बनाएर आउट भए। दीपेन्द्र सिंह ऐरीले १९ र गुल्शन झाले २६ रन बनाए। सोमपाल कामी १ रनमै आउट हुँदा रुपेश सिंह ८ र सन्दीप लामिछाने २ रनमा नटआउट रहे।
थोमस एन्ड्रयुज र केन रिचडेसन २ तथा म्याट ह्यामन्डले ३ विकेट लिए। हमिस मार्टिनले एक विकेट हात पारे।
नेपालले टस जितेर फिल्डिङ रोजेपछि पहिले ब्याटिङ गरेको नर्दन टेरिटोरीले २० ओभरमा ८ विकेट गुमाउँदै १७७ रन बनाएको थियो।
नर्दन टेरिटोरीका लागि ओपनर डिआर्सी सर्टले सर्वाधिक ५१ रन बनाए। ३४ बलमा ७ चौका र एक छक्का प्रहार गरेका उनलाई सन्दीप लामिछानेले बोल्ड गरे।
त्यसअघि अर्का ओपनर ज्याकव डिकमानलाई ११ रन बनाउँदा रुपेश सिंहले क्याचआउट गराएका थिए।
कोनर क्यारोल १८, जोर्डन सिल्क १९, थोमस एन्ड्रयूजले ३२ र क्याडेल म्याकमोहनले १२ रनको योगदान गरे। अन्य ब्याटरले दोहोरो अंकमा रन बनाउन सकेनन्।
नेपालका लागि सन्दीप लामिछानेले ३ विकेट लिँदा साहव आलमले २ विकेट लिए। रुपेश सिंह, दीपेन्द्र सिंह ऐरी र रोहित कुमार पौडेलले समान एक विकेट हात पारे।
