बैंकहरुले व्यवसाय विस्तारमा तीव्र ध्यान दिएका छन् भने आर्थिक गतिविधि लामो समयदेखि सुस्ताएको अवस्था पछि विस्तारै गतिशील बन्दैछ। केही समय अघिसम्म बैंकहरुमा निक्षेप भित्रिने क्रम बढ्दो देखिए पनि कर्जा प्रवाह भने सुस्त थियो। तर हाल दुवैमा वृद्धि देखिएको छ।
गत आर्थिक वर्ष २०८१–८२ को चौथो त्रैमासिक वित्तीय विवरण अनुसार वाणिज्य बैंकहरुले एकै वर्षमा ७ खर्ब ७७ अर्ब ९६ करोड रुपैयाँ बढी निक्षेप संकलन गरेका छन्। कुल निक्षेप अघिल्लो वर्षको ५६ खर्ब ६५ अर्ब ५७ करोड ४ लाख रुपैयाँबाट १३.७३ प्रतिशत वृद्धि हुँदै ६४ खर्ब ४३ अर्ब ७१ करोड ९१ लाख रुपैयाँ पुगेको छ। एनआइसी एशिया बाहेक सबै बैंकहरुको निक्षेप बढेको छ।
ग्लोबल आइएमई बैंकले सबैभन्दा बढी निक्षेप संकलन गरेको छ। बैंकको कुल निक्षेप ५ खर्ब ५० अर्ब ६२ करोड ८४ लाख पुगेको छ, अघिल्लो वर्षको तुलनामा १२.९६ प्रतिशत वृद्धि। नबिल बैंक दोस्रो स्थानमा छ, जसको निक्षेप ५ खर्ब २४ अर्ब ६२ करोड ५९ लाख पुगेको छ। राष्ट्रिय वाणिज्य बैंक तेस्रो स्थानमा रहँदै ५ खर्ब ४१ करोड ४६ लाख निक्षेप संकलन गरेको छ।
अन्य बैंकहरुमा नेपाल इन्भेष्टमेन्ट मेगा बैंक (४ खर्ब ७२ अर्ब ३४ करोड), कुमारी बैंक (३ खर्ब ६४ अर्ब ६३ करोड), लक्ष्मी सनराइज (३ खर्ब ६७ अर्ब ५ करोड), प्रभू बैंक (३ खर्ब ४२ अर्ब १८ करोड), नेपाल बैंक (३ खर्ब ३२ अर्ब २ करोड), हिमालयन बैंक (३ खर्ब ९ अर्ब १५ करोड) र एनआइसी एशिया (३ खर्ब १९ अर्ब ६ करोड) रहेका छन्। एनआइसी एशियाको निक्षेप भने ९.८९ प्रतिशतले घटेको छ।
निक्षेप संकलन वृद्धि गर्ने मामलामा एभरेष्ट बैंक अग्रणी छ। बैंकको निक्षेप २८.६३ प्रतिशत बढेर २ खर्ब ९८ अर्ब ८१ करोड पुगेको छ। एनएमबि बैंक २५.४५ प्रतिशत, प्राइम बैंक २४.७२ प्रतिशत, कृषि विकास बैंक २०.५० प्रतिशत, सिद्धार्थ बैंक १६.६० प्रतिशत, माछापुच्छ्रे बैंक १६.०९ प्रतिशत, नेपाल एसबिआई १३.७२ प्रतिशत, सानिमा बैंक १३.५७ प्रतिशत, सिटिजन बैंक ११.७७ प्रतिशत र स्ट्यान्डर्ड चार्टर्ड ११.४३ प्रतिशतले वृद्धि गरेको छ।
कर्जा प्रवाहमा पनि वृद्धिदर देखिएको छ। गत वर्ष बैंकहरुको कुल कर्जा लगानी ४८ खर्ब ५५ अर्ब ३८ करोड २४ लाख पुगेको छ, अघिल्लो वर्षको ४४ खर्ब ९१ अर्ब ८५ करोडको तुलनामा ८.०९ प्रतिशत वृद्धि। ग्लोबल आइएमई बैंक पहिलो स्थानमा छ, जसको कर्जा लगानी ११.५९ प्रतिशत बढेर ४ खर्ब २७ अर्ब ५८ करोड ७० लाख रुपैयाँ पुगेको छ। नबिल बैंक दोस्रो स्थानमा, जसको कर्जा प्रवाह १०.७० प्रतिशत वृद्धि हुँदै ४ खर्ब २६ अर्ब ९९ करोड पुगेको छ।
एनआइएमकको कर्जा प्रवाह ७.७३ प्रतिशत वृद्धि हुँदै ३ खर्ब ४२ अर्ब २८ करोड पुगेको छ भने राष्ट्रिय वाणिज्य बैंकको १८.१८ प्रतिशत वृद्धि भई ३ खर्ब ४ अर्ब ३७ करोड पुगेको छ। कर्जा प्रवाह वृद्धिमा एभरेष्ट बैंक पहिलो स्थानमा रहँदै २०.१९ प्रतिशत वृद्धि देखाएको छ। एनएमबि बैंक १८.३८ प्रतिशत, प्राइम बैंक १५.४७ प्रतिशत, नेपाल बैंक १३.४९ प्रतिशत, माछापुच्छ्रे बैंक ११.८२ प्रतिशत, सानिमा बैंक ११.२२ प्रतिशत, लक्ष्मी सनराइज १०.९१ प्रतिशत र सिद्धार्थ बैंक १०.६३ प्रतिशतले वृद्धि गरेको छ।
तर, एनआइसी एशिया (-१७.०७%), कुमारी बैंक (-१.४६%) र स्ट्यान्डर्ड चार्टर्ड (-१.०९%)को कर्जा प्रवाह घटेको छ।
