अमेरिकी ट्रम्प प्रशासनले अमेरिकी विश्वविद्यालयमा अध्ययन गर्न आएका वा अध्ययन गर्न चाहने विदेशी विद्यार्थीहरूको लागि नयाँ नियम प्रस्ताव गरेको छ, जसले विदेशी विद्यार्थीहरूको भिसा अवधि सीमित गर्नेछ।
हाल एफ भिसा (विद्यार्थी भिसा) भएका विद्यार्थीहरूलाई आफ्नो अध्ययन पूरा हुने समयसम्म अमेरिका बस्न अनुमति छ। तर प्रस्तावित नियम अनुसार, विद्यार्थीहरूले अध्ययन गर्ने कार्यक्रमको अवधि मात्रै अमेरिका बस्न पाउनेछन् र त्यो अवधि चार वर्षभन्दा बढी नहुनेछ। अध्ययन पूरा भएपछिका ६० दिनभित्र उनीहरूले अमेरिका छोड्नुपर्ने वा वैध स्थिति कायम गर्नुपर्ने व्यवस्था गरिएको छ।
नयाँ नियमले विदेशी मिडियाका प्रतिनिधि वा पत्रकारहरूको बसाइमा पनि सीमा तोकेको छ। यस अनुसार मिडिया कर्मचारीलाई अधिकतम २४० दिन अमेरिका बस्न अनुमति हुनेछ। यद्यपि, उनीहरूले आफ्नो कार्यकालका लागि समय थप गर्न सक्नेछन्।
ट्रम्प प्रशासनले विदेशी भिसा धारकलाई अनिश्चितकाल अमेरिका बस्न अनुमति दिँदा सुरक्षा जोखिम उत्पन्न भएको भन्दै यो नियम प्रस्ताव गरेको हो। प्रशासनका अनुसार समयसीमा राख्दा सरकारलाई विदेशी विद्यार्थीहरूको निगरानी गर्न सजिलो हुनेछ।
विदेश विभागले पछिल्लो केही महिनामा विद्यार्थी भिसाका नियम र प्रक्रियामा कडाइ गर्दै यस वर्ष ६,००० भन्दा बढी विद्यार्थी भिसा रद्द गरेको जनाएको छ। गत जूनमा अमेरिकी विदेश विभागले दूतावास र कन्सुलेटलाई विद्यार्थी भिसा आवेदकहरूको छानबिन गर्दा उनीहरूको “अमेरिकी नागरिकता, संस्कृति, सरकार, संस्थाहरू र संस्थापक सिद्धान्त प्रतिकूल व्यवहार जाँच्न” निर्देशन दिएको थियो।
