प्रधानमन्त्री केपी शर्मा ओलीले प्रतिबन्ध लगाइएका सामाजिक सञ्जालहरु खोल्न नसकिने दाबी गर्नुृभएको छ ।
मन्त्रिपरिषद् बैठक अगाडि बसेको नेपाली कांग्रेस पदाधिकारी तथा पूर्वपदाधिकारीको बैठकले सामाजिक सञ्जालहरुमाथि लगाइएको प्रतिबन्ध खोल्न सरकारलाई आग्रह गर्ने निर्णय गरेको थियो ।
स्वास्थ्य तथा जनसंख्या मन्त्री प्रदीप पौडेलले पार्टी निर्णयबारे प्रधानमन्त्री ओलीलाई जानकारी दिनुभएको थियो । ‘जे क्षति भयो, त्यो क्षति अनुसार आजको मन्त्रिपरिषद् बैठक बस्दै गर्दा आन्दोलनकारीको मागबारे केही न केही सम्बोधन गर्नुपर्छ’ पौडेलको प्रस्ताव थियो, ‘त्यो सम्बोधन गर्ने क्रममा सामाजिक सञ्जाल दर्ता कूटनैतिक ढंगले पहल गर्दै जाने र तत्काललाई खोल्ने निर्णय गर्नुपर्छ ।’
तर प्रधानमन्त्री ओलीले तत्काल प्रतिबन्ध हटाउन नसकिने जवाफ दिनुभयो । ‘सभापतिज्यूले पनि भन्नुभएको थियो । तर कम्पनीहरुले खुलेआम रुपले दर्ता गर्दैनौं भनिरहेका छन् । नियमन नगरी यतिकै खोल्न सकिंदैन’, प्रधानमन्त्री ओलीले भनाई राख्नुभयो ।
गृहमन्त्री पदबाट राजीनामा दिंदै रमेश लेखकले पनि सामाजिक सञ्जालहरुको प्रतिबन्ध खोल्न प्रस्ताव गरेपनि प्रधानमन्त्री ओलीको अटेर हटेन ।
‘तपाईंहरुले राखेको प्रस्तावमा सकारात्मक छु भन्नुभयो’, स्वास्थ्य मन्त्री पौडेलले भन्नुभयो। बैठकपछि अहिले प्रधानमन्त्री ओली र सभापति देउवाबीच बालुवाटारमै भेटवार्ता चलिरहेको छ ।
तर अहिले नेपाल टेलिकम प्राधिकरणले सबै सामाजिक सञ्चाल संचालनमा रोक लगाएको छैन । फेसबुक लगायत सबै चलिरहेका छन् ।
