घारपाछ्योङ गाउँपालिकाभित्र पर्ने मार्फा–छैरो–छीमाङ सडक खण्ड स्तरोन्नतिको तयारी अघि बढाइएको छ । गण्डकी प्रदेशको भौतिक पूर्वाधार तथा यातायात मन्त्रालयले आर्थिक वर्ष २०८२/८३ का लागि १ करोड रुपैयाँ बजेट विनियोजन गरेको हो ।
मुस्ताङको पूर्वाधार विकास कार्यालयका अनुसार मार्फाबाट सुरु भई छैरो हुँदै छीमाङ गाउँसम्म जोड्ने यो सडक खण्ड बेनी–जोमसोम ७६ किलोमिटर सडक मार्गको एक हिस्सा हो, जसको छैरोदेखि छीमाङसम्मको भाग लामो समयदेखि बेवास्तामा परेको छ ।
कार्यालयका प्रमुख अजयकुमार श्रेष्ठ का अनुसार मार्फा–छैरो पुल हुँदै छीमाङ जाने सडकलाई बहुवर्षीय आयोजना अन्तर्गत विकास गर्ने तयारी भइरहेको छ । उनले भने, “हाल हामीले यस सडकको काम रोकेका छौँ । यदि बहुवर्षीय कार्यक्रमको रूपमा स्वीकृति मिल्यो भने कार्यालयले अगाडि बढाउनेछ ।”
श्रेष्ठका अनुसार अहिले प्राथमिक रूपमा माटोको सडक सुधार र आवश्यक स्थानमा पिच गर्ने तयारी भइरहेको छ । यसका लागि प्रस्ताव प्रदेश मन्त्रालयमा पठाइएको छ, जसमा दीर्घकालीन रूपमा कालोपत्रे र अन्य संरचनागत सुधारको योजना समावेश गरिएको छ ।
यो सडक खण्ड घारपाछ्योङ गाउँपालिकाका मार्फा, छैरो र छीमाङ गाउँका बासिन्दाका लागि अत्यन्तै महत्वपूर्ण रहेको छ । सडक स्तरोन्नतिपछि स्थानीयवासीलाई परिवहन, बजार पहुँच र पर्यटन विकासमा सहजता हुने अपेक्षा गरिएको छ ।
