नेपालमा ट्रायम्फ मोटरसाइकलको आधिकारिक वितरक हान्सराज हलसचन्द्र एण्ड कम्पनीले लोकप्रिय ट्रायम्फ स्क्र्याम्बलर ४००एक्सको मूल्य दोस्रो पटक बढाएको छ।
अब नेपाली बजारमा यो स्टाइलिस स्क्र्याम्बलरको मूल्य रु. ७,१४,९०० पुगेको छ। प्रारम्भमा बाइकको इंट्रोडक्टरी मूल्य रु. ६,८९,९०० थियो, पहिलो मूल्य वृद्धि पछि यो रु. ६,९९,९०० पुगेको थियो। दोस्रो मूल्य वृद्धिले थप रु. १५,००० थपिएको छ।
ट्रायम्फ स्क्र्याम्बलर ४००एक्सले ३९८.१५ सिसी लिक्विड-कूल्ड, सिंगल सिलिन्डर इञ्जिन प्रयोग गर्छ, जसले ३९.५ बीएचपी शक्ति र ३७.५ एनएम टर्क उत्पादन गर्छ। ६-स्पीड गियरबक्समा स्लिप एण्ड एसिस्ट क्लच सुविधा छ।
सस्पेन्सनमा ४३ मिमि अपसाइड-डाउन (USD) बिग पिस्टन फ्रन्ट फोर्क र ग्यास मोनोशक रियर सस्पेन्सन छ, जसले दुबै पाङ्ग्रामा १५० मिमि यात्रा प्रदान गर्छ। बाइक हाइब्रिड स्पाइन/पेरिमिटर ट्युबुलर स्टिल फ्रेममा निर्माण गरिएको छ। सुरक्षा सुविधामा बोस डुअल-च्यानल ABS र स्विचेबल ट्र्याक्शन कन्ट्रोल समावेश गरिएको छ।
ट्रायम्फ स्क्र्याम्बलर ४००एक्सको नयाँ मूल्यले यसलाई प्रत्यक्ष रूपमा केटीएम ३९० एड्भेन्चर र रायल इनफिल्ड हिमालयन ४५०सँग प्रतिस्पर्धामा राखेको छ।
नेपालका बाइक प्रेमीहरूले मूल्य वृद्धिले कस्तो प्रभाव पार्छ भनेर विचार गरिरहेका छन्। तर जो हेरिटेज, स्टाइल र सहरसंग हल्का अफ-रोड क्षमतासहित बाइक खोजिरहेका छन्, उनीहरूका लागि यो बाइक अझै आकर्षक विकल्प बनेको छ।
ट्रायम्फ नेपालको नयाँ शोरूम र मजबूत बिक्रीपछिको सेवाले प्रिमियम मूल्यलाई समर्थन गरेको छ। बाइकप्रेमीहरूले अब रु. ७,१४,९००मा स्टाइल, प्रदर्शन र ब्राण्ड मूल्यको मूल्याङ्कन गर्नुपर्नेछ।
