एभरेष्ट बैंक लिमिटेडले चालु आर्थिक वर्ष २०८२/८३ को पहिलो त्रैमाससम्मको अपरिष्कृत वित्तीय विवरण सार्वजनिक गरेको छ। विवरण अनुसार बैंकले यस अवधिमा नाफा, सञ्चालन मुनाफा र ब्याज आम्दानी लगायतका सूचकमा उल्लेख्य सुधार गर्न सफल भएको छ।
नाफामा ४.५६ प्रतिशतको वृद्धि
समीक्षा अवधिमा बैंकले १ अर्ब १७ करोड ९२ लाख रुपैयाँ खुद नाफा आर्जन गरेको छ। यो नाफा गत आर्थिक वर्षको सोही अवधिको १ अर्ब १२ करोड ७७ लाख रुपैयाँभन्दा ४.५६ प्रतिशतले बढी हो। लगातार नाफा वृद्धि भएसँगै बैंकले सञ्चालन स्थायित्व र लगानी क्षमतामा मजबुती प्रदर्शन गरेको छ।
ब्याज आम्दानीमा दोहोरो अंकको वृद्धि
एभरेष्ट बैंकको खुद ब्याज आम्दानी १२.३८ प्रतिशतले बढेर २ अर्ब ४० करोड ३८ लाख रुपैयाँ पुगेको छ। गत आर्थिक वर्षको सोही अवधिमा यो आम्दानी २ अर्ब १३ करोड ९० लाख रुपैयाँ मात्र थियो। ब्याज आम्दानीमा आएको वृद्धिले बैंकको मुख्य व्यवसायिक गतिविधि मजबुत भएको स्पष्ट संकेत गरेको छ।
सञ्चालन मुनाफा र पूँजी स्थिति
सञ्चालन मुनाफा पनि ४.५८ प्रतिशतले बढेर १ अर्ब ६८ करोड ५५ लाख रुपैयाँ पुगेको छ। गत वर्ष सोही अवधिमा यो १ अर्ब ६१ करोड १६ लाख रुपैयाँ थियो।
असोज मसान्तसम्म बैंकको
-
चुक्ता पुँजी: १२ अर्ब ९४ करोड रुपैयाँ
-
प्रतिशेयर आम्दानी (EPS): ३६ रुपैयाँ ४४ पैसा
-
प्रतिशेयर नेटवर्थ: २५५ रुपैयाँ ६९ पैसा
