संयुक्त राज्य अमेरिकामा ४३ दिनदेखि जारी इतिहासकै सबैभन्दा लामो सरकारी बन्द अन्त्य भएको छ। राष्ट्रपति डोनाल्ड ट्रम्प ले बुधबार राति सरकार पुनः सञ्चालनका लागि खर्च विधेयकमा हस्ताक्षर गरेसँगै देशको सरकारी कामकाज पुनः सुरु भएको हो।
उक्त छोटो अवधिको खर्च विधेयक अमेरिकी प्रतिनिधिसभाले २२२–२०९ मतान्तरले पारित गरेको थियो, जसलाई दुई दिनअघि मात्रै सिनेटले सानो बहुमतका साथ अनुमोदन गरेको थियो। ट्रम्पले विधेयक पारित भएको केही घण्टामै त्यसमा हस्ताक्षर गरेर सरकारी बन्दको अन्त्य गरेका हुन्।
हस्ताक्षरपछि राष्ट्रपतिको निवास व्हाइट हाउसमा पत्रकारहरूसँग कुरा गर्दै ट्रम्पले भने, “सरकार अब सामान्य सञ्चालनमा फर्किनेछ। ४३ दिन लामो बन्दका कारण धेरै मानिसहरू गम्भीर रूपमा प्रभावित भएका छन्।”
गत अक्टोबरदेखि सुरु भएको सरकारी बन्दका कारण करिब १४ लाख संघीय कर्मचारीहरू तलबबिना काम गर्न वा अनिवार्य विदामा बस्न बाध्य भएका थिए। खाद्य सहायता कार्यक्रम रोकिएको, हवाई यातायातमा अवरोध आएको, र विभिन्न संघीय सेवा स्थगित भएका थिए।
अब केही दिनभित्रै सरकारी सेवा, तलब वितरण, र सार्वजनिक कार्यक्रमहरू क्रमशः पुनः सञ्चालन हुने अपेक्षा गरिएको छ। तर, यो राहत अस्थायी मात्र हो, किनभने नयाँ पारित विधेयकले आगामी जनवरी ३० सम्मका लागि मात्र बजेट उपलब्ध गराउनेछ। त्यसपछि कांग्रेसले पुनः नयाँ खर्च विधेयक पारित गर्नुपर्नेछ, अन्यथा पुनः अर्को सरकारी बन्दको जोखिम रहनेछ।
