यस वर्ष कार्तिक महिनामा (अक्टोबर मध्यदेखि नोभेम्बर मध्यसम्म) अन्नपूर्ण संरक्षण क्षेत्र आयोजना (ACAP) मा अन्तर्राष्ट्रिय पर्यटकहरूको आगमन उल्लेख्य रूपमा बढेको छ। यस अवधिमा ३५ हजार ९५२ विदेशी पर्यटकले विभिन्न गन्तव्य भ्रमण गरेका छन्।
यो संख्या गत वर्षको सोही महिनाको तुलनामा ८ प्रतिशत बढी हो। गत वर्ष यही समयमा ३३ हजार ३१० विदेशी पर्यटकले ACAP अन्तर्गतका क्षेत्रहरू भ्रमण गरेका थिए। विश्वका उत्कृष्ट ट्रेकिङ मार्गमध्ये एक मानिने ACAP मा असोज र कार्तिक विशेष गरी उपयुक्त ट्रेकिङ मौसमका रूपमा चिनिन्छन्।
ACAP प्रमुख डा. रबिन कडरिया अनुसार यस वर्ष विदेशी आगन्तुकमध्ये भारतीय पर्यटकको संख्या सबैभन्दा धेरै छ। विदेशी मात्र होइन, घरेलु पर्यटकको संख्यामा पनि वर्षेनि उल्लेख्य वृद्धि भइरहेको उनले बताए। दशैं–तिहार जस्ता प्रमुख चाडपर्वको बिदालाई सदुपयोग गर्दै धेरै नेपालीले अन्नपूर्ण क्षेत्रका ट्रेकिङ मार्ग रोज्ने गरेको पाइएको छ।
ACAP अन्तर्गतका प्रमुख पर्यटकीय गन्तव्यहरूमा अन्नपूर्ण बेस क्याम्प, मर्दी पीक, घान्द्रुक, तिलिछो ताल, थोरोङ ला पास, अपर मुस्ताङ, घोरेपानी, पूनहिल लगायतका स्थान परेका छन्।
यस संरक्षण क्षेत्रले कास्की, लमजुङ, मनाङ, म्याग्दी र मुस्ताङका गरी १५ स्थानीय तह समेट्छ।
