मतदाता नामावलीमा नाम दर्ता तथा नवीकरणको समय मंसिर ५ गते मध्यरातबाट सकिएसँगै नयाँ मतदाता संख्या ८ लाख ३७ हजार ९४ जना थपिएको छ, जुन निर्वाचन आयोगले ‘उत्साहजनक’ भएको जनाएको छ।
पछिल्लो मतदाता नामावली सुरु हुनु अघि १ करोड ८१ लाख ६८ हजार मतदाता रहेकोमा आगामी निर्वाचनका लागि यसपटक उल्लेख्य वृद्धि भएको छ।
निर्वाचन आयोगका प्रवक्ता नारायणप्रसाद भट्टराईका अनुसार,
-
निर्वाचन कार्यालयमा गएर फोटो खिचेर दर्ता गर्ने: ३,४४,९१४ जना
-
राष्ट्रिय परिचयपत्र प्रयोग गरी आवेदन गर्ने: ४,९२,१८० जना
“सुरुवाती दिनहरूमा नामावली सन्तोषजनक मात्र थियो, पछिल्ला दिनहरूमा उत्साहजनक बन्यो,” भट्टराईले भने।
निर्वाचन आयोगले मृतक वा उजुरी भएका मतदाताको विवरण टुंगो लगाएर पुस १५ भित्र अन्तिम मतदाता संख्या सार्वजनिक गर्ने तयारीमा छ।
निर्वाचनमा मतदान केन्द्रसम्म मतदातालाई पुर्याउने चुनौती अझै बाँकी रहेको छ। पूर्वप्रमुख निर्वाचन आयुक्त नीलकण्ठ उप्रेतीका अनुसार, विशेष गरी विदेश वा फरक जिल्लामा रहेका मतदातालाई मतदानमा उत्प्रेरित गर्नु राजनीतिक दलहरूको महत्त्वपूर्ण भूमिका हो।
गत आमनिर्वाचनमा करिब ६१ प्रतिशत मत खसेको थियो। २०७४ सालको आमनिर्वाचनमा ६८.६७%, २०७० सालको दोस्रो संविधानसभामा ७८.७४% र २०६४ सालको पहिलो संविधानसभामा प्रत्यक्षतर्फ ६१.७% मत खसेको तथ्यांक छ।
यो पटक प्रविधिको प्रयोग र राष्ट्रिय परिचयपत्र प्रणालीसँगको समन्वयले मतदाता दर्ता प्रक्रिया सरल बनेको र युवापुस्तामा उत्साह सिर्जना भएको आयोगले जनाएको छ।
हाल नेपालमा १ करोड ९० लाखभन्दा बढी राष्ट्रिय परिचयपत्र नम्बर भएका छन्। विदेशमा रहेका र अनलाइन आवेदन दिएका नागरिकले पनि मतदानमा सहभागी हुन सक्ने व्यवस्था बनाईएको छ।
जारी मतदाता नामावली अनुसार, आगामी फागुन २१ का लागि निर्धारित प्रतिनिधिसभा सदस्यको निर्वाचनमा मतदान गर्न योग्य हुनेछन्। विदेशबाट मतदान सम्भव हुने वा नहुने विषयमा कानुनी व्यवस्थापनका लागि सरकारले अध्यादेशमार्फत विकल्प राख्ने तयारीमा छ।
निर्वाचन आयोग र राष्ट्रिय परिचयपत्र तथा पञ्जीकरण विभाग बीचको साझेदारीले विदेशमा रहेका नेपालीहरूले पनि सोझै नाम दर्ता आवेदन गर्न सक्ने सुविधा प्रदान गरेको छ।
