पोखरा एभेन्जर्ससँग सहकार्य गर्दै टेनप्लास्ट र टेनस्टिलले सामुदायिक लाभमा केन्द्रित “टेनप्लास्ट इम्प्याक्ट क्याम्पेन” सुरु गरेका छन्। खेलमैदानमा बनाइने स्कोरलाई प्रत्यक्ष सामाजिक सहयोगमा रूपान्तरण गर्ने लक्ष्यसहित सुरु गरिएको यो अभियानले खेलको रोमाञ्चलाई समुदायमै उपयोगी योगदानमा बदल्ने अपेक्षा राखिएको छ।
अभियानअन्तर्गत पोखरा एभेन्जर्सले प्रतिस्पर्धामा प्रहार गर्ने प्रत्येक चौका, छक्का र टिमले हासिल गर्ने जितसँगै स्वच्छ पानीका ट्यांकी वितरण गरिने कम्पनीले जनाएको छ। सार्वजनिक गरिएको विवरण अनुसार—
-
प्रत्येक चौका = ३०० लिटरको टेनप्लास्ट वाटर ट्यांक
-
प्रत्येक छक्का = ५०० लिटरको ट्यांक
-
प्रत्येक जित = १००० लिटरको वाटर ट्यांक
यसरी संकलन भएका सबै ट्यांकीहरू स्वच्छ पानीको पहुँच अभाव भएका समुदाय, विद्यालय तथा स्थानीय संरचनामा उपलब्ध गराइनेछन्। सुरक्षित पानी, सरसफाइ र स्वास्थ्यसम्बन्धी सचेत अभ्यास प्रवर्द्धनमा यसले दीर्घकालीन प्रभाव पार्ने अपेक्षा राखिएको छ।
“अब प्रत्येक रन र प्रत्येक जित समुदायका लागि प्रत्यक्ष सहयोग बन्नेछ,” टेनप्लास्टले जारी गरेको वक्तव्यमा उल्लेख छ। कम्पनीका अनुसार यो अभियान कर्पोरेट सामाजिक उत्तरदायित्व (CSR) लाई व्यावहारिक र प्रत्यक्ष समाधानसँग जोड्ने महत्वपूर्ण कदम हो।
प्रतियोगिता अगाडि बढ्दै जाँदा, दर्शक तथा प्रशंसकहरूले खेलको रौनकसँगै समुदायमा पुगेको प्रत्यक्ष योगदान पनि अनुभव गर्न सक्नेछन्, जसले खेल र समाजबीचको सम्बन्धलाई अझ नजिक बनाउने विश्वास गरिएको छ।
नेपालमा निर्माण सामग्री तथा औद्योगिक समाधान प्रदान गर्दै आएको टेन ग्रुपका टेनप्लास्ट, टेन स्टिल्स, मारुति ट्रेडर्स, मारुति बिजनेस कन्सर्न, डीआर मल्टी ट्रेड र टेन मल्टी माइन्सजस्ता कम्पनीहरूले वर्षौंदेखि निर्माण, कृषि र स्थानीय परियोजनामा आवश्यक सामग्री आपूर्ति गर्दै आएका छन्। समूहले उत्पादन र व्यापारसँगै सामुदायिक सहयोग र दिगो विकासलाई आफैँमा कर्तव्यका रूपमा अघि बढाइरहेको बताएको छ।
