एनसेलले नेपाल प्रिमियर लिग (एनपीएल) दोस्रो संस्करणको डिजिटल स्ट्रिमिङ पार्टनर डिसहोमसँगको सहकार्यमा ग्राहकका लागि ‘एनपीएल प्ले प्याक’ संचालनमा ल्याएको छ। यस प्याकमार्फत एनसेलका ग्राहकले मोबाइलमा नै हाल भईरहेका खेलहरुको प्रत्यक्ष मजा लिन सक्नेछन्।
एनपीएल प्ले प्याक प्रयोग गर्न ग्राहकले मोबाइलमा ‘डिशहोम गो’ एप डाउनलोड गर्नुपर्नेछ। प्याकमा २८ दिनका लागि १ जीबी डेटा बन्डल उपलब्ध गराइएको छ र प्याकको मूल्य करसहित रु २९९ रहेको छ। ग्राहकले एनसेल एप वा ८१२३३ डायल गरी, वा देशभरका एनसेल खुद्रा विक्रेताबाट सहजै प्याक खरिद गर्न सक्नेछन्। प्याक खरिद गरेपछि मोबाइलमा प्राप्त एसएमएसमार्फत एपमा लगइन गरी खेलहरु प्रत्यक्ष हेर्न सकिन्छ।
एनसेलका चिफ कन्जुमर बिजनेस अफिसर उपङ्ग दत्तले भने, “बन्डल डेटासहित एनपीएल खेलहरु मोबाइलमा प्रत्यक्ष हेर्न पाउने सुविधा ग्राहकहरुलाई उपलब्ध गराउन पाउँदा हामी खुशी छौँ। डिसहोमसँगको साझेदारीले निर्बाध रुपमा खेल हेर्ने सुविधा दिएको छ र क्रिकेटको रोमाञ्चकतालाई अझ बढाउनेछ।”
यसैगरी, एनसेलले एनपीएलसँग पहिलो संस्करणजस्तै दोस्रो संस्करणमा पनि ‘पावर्ड वाइ’का रुपमा सहकार्य जारी राखेको छ। यसपटक ‘युनाइटेड वाइ क्रिकेट, कनेक्टेड वाइ एनसेल’ भन्ने नाराका साथ एनसेल एनपीएलमा सहभागी छ।
एनसेल फाउन्डेसनले व्यवसायिक सामाजिक जिम्मेवारीअनुसार प्रत्येक चौकामा ग्रामीण र दुर्गम क्षेत्रका सामुदायिक विद्यालयका विद्यार्थीहरूलाई ४ वटा शैक्षिक सामग्री प्रदान गर्ने कार्यक्रम पनि जारी राखेको छ।
