देशको वित्तीय प्रणालीमा बढ्दो तरलता व्यवस्थापन गर्न नेपाल राष्ट्र बैंकले फेरि ४० अर्ब रुपैयाँ बराबरको निक्षेप संकलन गर्ने भएको छ। केन्द्रीय बैंकले निक्षेप संकलन उपकरण मार्फत ३५ दिनका लागि थप निक्षेप तान्न लागेको हो।
राष्ट्र बैंकका अनुसार मंसिर १४ गते दिउँसो २ बजेदेखि अनलाइन बिडिङ सिस्टम मार्फत बोलकबोल प्रक्रिया सञ्चालन हुनेछ। आवेदन स्वीकृत भई निक्षेप खरिद भने आजै गरिनेछ।
१० करोडदेखि सुरु, अधिकतम सीमा आह्वान रकमअनुसार
इच्छुक संस्थाले न्यूनतम १० करोड रुपैयाँ र अधिकतम रकम ५ करोडले भाग गर्दा निःशेष भाग जाने गरी निर्धारण गरिएको कुल आह्वान रकमसम्म आवेदन दिन सक्नेछन्। निक्षेपको परिपक्वता (सावाँ) र ब्याज भुक्तानी पुस २० गते हुनेछ।
बहुब्याजदर प्रणाली उपलब्ध
निक्षेप संकलनमा बोलकबोल ब्याजदर आधारित हुनेछ। सहभागी बैंक तथा वित्तीय संस्थाले बहुब्याजदरमा पनि बहुबोलकबोल गर्न सक्ने व्यवस्था गरिएको राष्ट्र बैंकले स्पष्ट पारेको छ। यस प्रक्रियामा ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउनेछन्।
