अर्थमन्त्री रामेश्वर खनालले निजी क्षेत्रमाथिको आक्रमण उचित नभएको स्पष्ट पार्दै सबैले निजी क्षेत्रको संरक्षणमा जोड दिनुपर्ने बताएका छन्। नेपाल आर्थिक पत्रकार संघ (नाफिज)को १६ औँ वार्षिक साधारण सभामा बोल्दै उनले भने, “निजी क्षेत्रले तयार पारेको संरचना र सम्पत्ति नेपाली जनताको पनि हो। निजी क्षेत्रले निश्चित समय पछि छोड्ने नै हो। उनीहरूमाथिको आक्रमण ठिक छैन।”
उनले गलत व्यक्ति वा संस्थामाथि जथाभावी कदम चाल्दा निरुत्साहित हुने र विधि अनुसार सुधार गर्न सकिने उल्लेख गरे। “यदि कसैले अपराध नै गरेको छ भने त्यसको सजाय दिन सरकार तयार छ। तर सडक, सामाजिक सञ्जाल वा सञ्चार माध्यमबाट जथाभावी टिप्पणी गर्नुहुँदैन,” अर्थमन्त्री खनालले जोड दिए।
अर्थमन्त्री खनालले जेनजी आन्दोलन आर्थिक समृद्धि मात्रका लागि नभएको पनि स्मरण गराउँदै भ्रष्टाचार अन्त्य र सेवा प्रवाह पारदर्शी बनाउने उद्देश्य रहेको बताए।
त्यसैगरी, उनले आगामी निर्वाचन समयमै हुने विश्वास दिलाउँदै सबै दल र आम नागरिकको सहमतिमा सुरक्षित, निष्पक्ष र भयरहित निर्वाचनको आवश्यकता औँल्याए। “अन्तर्राष्ट्रिय जगतले नेपालको लोकतान्त्रिक अभ्यासको राम्रो मूल्यांकन गरिरहेको छ। त्यस दृष्टिकोणमा कुनै परिवर्तन हुँदैन,” उनले स्पष्ट पारे।
अन्ततः अर्थमन्त्री खनालले निजी क्षेत्रको सुरक्षा, पारदर्शिता, र लोकतान्त्रिक अभ्यास सुनिश्चित गर्दै आर्थिक विकासमा केन्द्रित रहन सरकार प्रतिबद्ध रहेको जानकारी दिए।
