नेपाल एसबिआई बैंक लिमिटेडले लाभांश प्रस्ताव लगायत महत्वपूर्ण एजेन्डा पारित गर्न पुस १८ गते ३२औँ वार्षिक साधारण सभा (एजीएम) बोलाएको छ। सभा शुक्रबार बिहान ११ बजे त्रिभुवन आर्मी अफिसर्स क्लब, भद्रकाली, काठमाडौंमा सुरु हुने बैंकले जनाएको छ।
एजीएमले हाल कायम चुक्ता पूँजीको ५ प्रतिशत बोनस शेयर तथा सोको कर प्रयोजनार्थ ५ प्रतिशत नै नगद लाभांश वितरण गर्ने प्रस्ताव अनुमोदन गर्नेछ। बैंकको यो लाभांश सिफारिस आर्थिक रूपमा स्थायित्व र शेयरधनीमैत्री नीति निरन्तरता रहेको संकेतका रूपमा हेरिएको छ।
यससँगै, साधारण सभाले बैंकलाई अन्य उपयुक्त बैंक तथा वित्तीय संस्थासँग मर्जर वा एक्विजिशनसम्बन्धी प्रक्रिया अघि बढाउन सञ्चालक समितिलाई अधिकार प्रदान गर्ने प्रस्ताव पनि निर्णयका लागि प्रस्तुत गर्दैछ। साथै सर्वसाधारण शेयरधनी समूहबाट एक जना सञ्चालकको निर्वाचन, आगामी आर्थिक वर्षका लागि लेखापरीक्षक नियुक्ति तथा प्रबन्धपत्र–नियमावली संशोधनसम्बन्धी प्रस्तावहरू पनि सभामा पेस गरिनेछन्।
बैंकले साधारण सभा तथा लाभांश वितरण प्रयोजनका लागि पुस ४ गते एक दिन बुकक्लोज गर्दैछ। यसअनुसार पुस ४ गतेभन्दा अघिल्लो दिनसम्म नेप्सेमा कारोबार भई नाम दर्ता भएका शेयरधनीहरूले एजीएममा सहभागी भई लाभांश प्राप्त गर्न सक्नेछन्।
बैंकका अनुसार एजीएमले संस्थागत शासनदेखि संरचनात्मक विस्तारसम्मका निर्णयमार्फत आगामी वर्षका लागि रणनीतिक दिशा तय गर्ने अपेक्षा गरिएको छ।
