सोमबार नेपाली बजारमा सुनचाँदीको मूल्यले नयाँ ऐतिहासिक उचाइ छोएको छ। अघिल्लो दिनमै उल्लेख्य रूपमा बढेको मूल्य आज फेरि एकैदिन ठूलो दरले वृद्धि हुँदा सुनचाँदी बजारमा चासो र उत्साह दुवै बढेको देखिएको छ।
नेपाल सुनचाँदी व्यवसायी महासंघका अनुसार आज छापावाल सुनको मूल्य प्रतितोला ४ हजार १०० रुपैयाँले बढेर दुई लाख ७४ हजार ७ सय रुपैयाँ पुगेको छ। यो हालसम्मकै उच्च मूल्य हो। आइतबार छापावाल सुन प्रतितोला दुई लाख ७० हजार ६ सय रुपैयाँमा कारोबार भएको थियो। त्यसअघि हिजो मात्रै सुनको मूल्य प्रतितोला २ हजार ८ सय रुपैयाँले बढेको थियो।
यस्तै, चाँदीको मूल्य पनि लगातार उकालो लागेको छ। आइतबार प्रतितोला २१० रुपैयाँले बढेको चाँदी आज फेरि प्रतितोला २०५ रुपैयाँले बढेर पाँच हजार १ सय ९५ रुपैयाँमा कारोबार भइरहेको छ। आइतबार चाँदी प्रतितोला चार हजार ९ सय ९० रुपैयाँमा किनबेच भएको थियो।
