स्वतन्त्र ऊर्जा उत्पादकहरूको संस्था नेपाल (इप्पान) का अध्यक्ष गणेश कार्कीले निजी क्षेत्रलाई विद्युत व्यापारको लाइसेन्स दिन सरकारसँग आग्रह गरेका छन्। इप्पानको २६औं वार्षिकोत्सवका अवसरमा आइतबार काठमाडौंमा आयोजित कार्यक्रममा उनले निजी क्षेत्र विद्युत व्यापारका लागि पूर्ण रूपमा सक्षम र तयार भएको बताए।
कार्कीले नेपाल विद्युत प्राधिकरणले नयाँ विद्युत खरिद सम्झौता (पीपीए) नगरेको अवस्थामा निजी क्षेत्रलाई विद्युत व्यापारको अधिकार दिन अपरिहार्य भएको उल्लेख गरे। “हामीले लामो समयदेखि यस विषयमा आवाज उठाउँदै आएका छौं। अहिले प्राधिकरणले पीपीए गर्दैन, यस्तो अवस्थामा निजी क्षेत्रलाई विद्युत व्यापारको लाइसेन्स दिनुपर्छ,” उनले भने।
उनीसँगै आयोजित कार्यक्रममा अध्यक्ष कार्कीले जलविद्युत आयोजना निर्माणका क्रममा निजी क्षेत्रले भोग्दै आएको झन्झटिलो प्रक्रिया पनि अन्त्य गर्न सरकारको ध्यानाकर्षण गराए। “एउटा आयोजना अगाडि बढाउन १६ वटा मन्त्रालय धाउनुपर्छ, यसैमा पाँच वर्ष बित्छ। सरकारले आयोजना बनाउनुपर्छ भन्ने नीतिसँगै वन क्षेत्रमा छिर्न नदिने जस्ता विरोधाभासी नीति अन्त्य गर्नुपर्छ,” उनले बताए।
अध्यक्ष कार्कीले आयोजनाको निर्माण अवधि लम्बिँदा वित्तीय भार बढ्ने भएकाले आरसीओडी (व्यावसायिक सञ्चालन मिति) को म्याद थप्न पनि आग्रह गरे। नीतिगत र प्रक्रियागत सुधार भए निजी क्षेत्रले ऊर्जा उत्पादनसँगै व्यापारमार्फत देशको विद्युत विस्तार र अर्थतन्त्रमा उल्लेखनीय योगदान दिन सक्ने बताए।
