काठमाडौं । नेपाल स्टक एक्सचेञ्ज मा सूचीकृत सिमेन्ट कम्पनीहरूले चालु आर्थिक वर्ष २०८२/८३ को दोस्रो त्रैमाससम्म सन्तोषजनक वित्तीय प्रदर्शन देखाएका छन्। मुलुकको सुस्त आर्थिक गतिविधि र निर्माण क्षेत्रमा मन्दीका बाबजुद एउटा कम्पनी बाहेक सबैको खुद नाफामा उल्लेख्य सुधार भएको छ।
विशेषगरी स्वदेशी चुनढुङ्गा प्रयोग गरी मूल्य अभिवृद्धि गर्दै आएका यी उद्योगहरूले आन्तरिक मागमा सुधार र सञ्चालन खर्च व्यवस्थापनका कारण नाफा बढाएको नेप्सेले जनाएको छ। तर, सरकारको कमजोर पुँजीगत खर्च र भारतीय बजारमा निर्यातका प्राविधिक अवरोधहरू चुनौतीका रूपमा रहेका छन्।
सर्वोत्तम सिमेन्ट लिमिटेड
सर्वोत्तम सिमेन्ट चालु आर्थिक वर्षको पहिलो ६ महिनामा खुद नाफा १२३% वृद्धि हुँदै ५३ करोड ८३ लाख ५० हजार रुपैयाँ पुगेको छ। उत्पादन बिक्रीबाट ४ अर्ब ८ करोड २५ लाख रुपैयाँ आम्दानी गरेको कम्पनीको प्रतिशेयर आम्दानी (EPS) २०.६१ रुपैयाँ छ। ५% बोनस शेयर वितरणपछि चुक्तापुँजी ५ अर्ब २२ करोड पुगेको छ भने जगेडा कोषमा ४ अर्ब ६४ करोड ५५ लाख रुपैयाँ सञ्चित छ। कम्पनीको प्रतिशेयर नेटवर्थ १८८.९२ रुपैयाँ कायम छ।
शिवम सिमेन्ट लिमिटेड
शिवम सिमेन्टले पुस मसान्तसम्म ३५ करोड ७० लाख रुपैयाँ खुद नाफा आर्जन गरेको छ, जुन गत वर्षको तुलनामा ५२८.५२% वृद्धि हो। उत्पादन बिक्रीबाट ३ अर्ब ९ करोड रुपैयाँ आम्दानी भएको कम्पनीको EPS १२.७७ रुपैयाँ छ। ५ अर्ब ५९ करोड ३२ लाख रुपैयाँ चुक्तापुँजी भएको कम्पनीको जगेडा कोषमा ४ अर्ब ४९ करोड ९६ लाख रुपैयाँ रहेको छ र प्रतिशेयर नेटवर्थ १८०.३८ रुपैयाँ कायम छ।
सोनापुर मिनरल्स एन्ड आयल लिमिटेड
गत वर्ष नोक्सानीमा रहेको सोनापुर यस वर्ष नाफामा फर्किएको छ। दोस्रो त्रैमाससम्म ४ करोड ७५ लाख रुपैयाँ खुद नाफा आर्जन गरेको कम्पनीको उत्पादन बिक्री १ अर्ब ६९ करोड रुपैयाँ रहेको छ। चुक्तापुँजी ३ अर्ब ५ करोड ५० लाख रुपैयाँ रहेको यस कम्पनीको EPS ३.०९ रुपैयाँ छ भने प्रतिशेयर नेटवर्थ १९१.४२ रुपैयाँ छ।
घोराही सिमेन्ट उद्योग लिमिटेड
अन्य कम्पनी नाफामा रहँदा घोराही सिमेन्ट २६ करोड ४९ लाख रुपैयाँ ऋणात्मक रहेको छ। गत वर्षको ६६ करोड ७१ लाख रुपैयाँ घाटाको तुलनामा नोक्सानी घटेको छ। १०% बोनस शेयर वितरण गरी ५ अर्ब २ करोड ४४ लाख रुपैयाँ चुक्तापुँजी पुर्याएको कम्पनीको EPS १०.५४ रुपैयाँ ऋणात्मक छ। उत्पादन बिक्रीबाट २ अर्ब ८ करोड रुपैयाँ आम्दानी गरेको घोराहीको प्रतिशेयर नेटवर्थ १६६.५८ रुपैयाँ रहेको छ।
नेपालका यी सिमेन्ट उद्योगहरूले स्वदेशी चुनढुङ्गा प्रयोग गरी मूल्य अभिवृद्धिमा योगदान दिँदै आएका छन्। भारतीय सरकारले गुणस्तर नवीकरणमा कडाइ गरे पनि र सरकारको कमजोर पुँजीगत खर्चका बाबजुद अधिकांश कम्पनीले नाफामा सुधार गर्नुलाई विशेषज्ञहरूले सकारात्मक संकेतका रूपमा लिएका छन्।
