काठमाडौं। नेपालमा निर्माण सामग्री क्षेत्रमा स्थापित अम्बे सिमेन्ट प्रालि (एसीपीएल) ले सन् २०२५ मा व्यापारमा ठूलो उछाल देखाएको छ। कम्पनीको व्यापार गत वर्ष ७२६.२८ प्रतिशतले बढ्दै १ अर्ब २८ करोड ९० लाख रुपैयाँ पुगेको छ। यसअघि सन् २०२४ मा व्यापार मात्र १५ करोड ६० लाख रुपैयाँमा सीमित थियो।
व्यापारमा सुधारसँगै कम्पनीको नाफाको स्थिति पनि सकारात्मक देखिएको छ। आर्थिक वर्ष २०२५ मा ७ करोड १० लाख रुपैयाँ सञ्चालन नाफा आर्जन गर्न सफल कम्पनीले अघिल्लो वर्ष ५ करोड ७० लाख रुपैयाँ घाटा व्यहोरेको थियो। यद्यपि, उच्च ब्याज खर्च र अन्य प्राविधिक कारणले कम्पनी अझै २ करोड ९० लाख रुपैयाँ खुद घाटामा रहे पनि यो अघिल्लो वर्षको ९ करोड ३० लाख रुपैयाँको घाटा भन्दा निकै कम हो।
कार्यपुँजी व्यवस्थापन र बैंक ऋण:
कम्पनीको कार्यपुँजी व्यवस्थापन अझै चुनौतीपूर्ण छ। कच्चा पदार्थ खरिदमा नगद भुक्तानी गर्नुपर्ने बाध्यताका कारण बैंक ऋणमा निर्भरता उच्च रहेको छ। सन् २०२६ को मध्य जनवरीसम्म कम्पनीले बैंकको ऋण सीमा ८०–९० प्रतिशत उपयोग गरेको छ। तर, उधारो उठाउने समय ७९६ दिनबाट घटेर ९३ दिनमा झरेकोले कार्यपुँजी दक्षतामा सुधार आएको देखिन्छ।
केयर रेटिङ्स नेपालले कम्पनीको ६५ करोड ७५ लाख ९० हजार रुपैयाँ बराबरको अल्पकालीन बैंक कर्जा सुविधाको रेटिङ ‘केयर-एनपी ए४’ यथावत राखेको छ।
कम्पनीको प्रोफाइल:
अम्बे सिमेन्ट प्रालि सन् २००४ मा पर्सामा क्लिंकर ग्राइन्डिङ प्लान्ट स्थापना गरी उत्पादनमूलक र व्यापारिक अनुभव भएका पेशेवरहरूले स्थापना गरेको निजी लिमिटेड कम्पनी हो। दैनिक १,००० मेट्रिक टन उत्पादन क्षमता भएको यस उद्योगले पीपीसी, ओपीसी, पीएससी जस्ता १० वटा ब्रान्डका सिमेन्ट उत्पादन गर्दै बिक्री वितरण गर्दै आएको छ।
कम्पनीको मुख्य चुनौती व्याकवार्ड इन्टिग्रेसनको अभाव र कच्चा पदार्थको लागि प्रतिस्पर्धी तथा आयातमा निर्भरता हो।
१७ वर्षभन्दा लामो इतिहास बोकेको अम्बे सिमेन्ट प्रालि नेपालको निर्माण सामग्री क्षेत्रमा महत्वपूर्ण योगदान गर्दै आएको छ र हालको व्यापार तथा नाफाको उछालले भविष्यमा कम्पनीको विकास र बजार स्थिति थप मजबुत हुने संकेत गर्दछ।
