काठमाडौं । उत्तर कोरियाको सत्तारूढ वर्कर्स पार्टीले किम जोङ उनलाई पुनः महासचिवमा सर्वसम्मत चयन गरेको छ। आइतबार सम्पन्न पार्टी महाधिवेशनले उनलाई पुनः नेतृत्वको जिम्मेवारी सुम्पिएको घोषणा गरेको हो।
सरकारी समाचार संस्था KCNAका अनुसार किमको नेतृत्वमा देशले आणविक शक्तिलाई केन्द्रमा राख्दै आफ्नो युद्ध प्रतिरोध क्षमतामा उल्लेखनीय सुधार गरेको दाबी गरिएको छ। लामो समयदेखि अन्तर्राष्ट्रिय प्रतिबन्धहरू खेपिरहेको भए पनि प्योङयाङले आणविक कार्यक्रमलाई निरन्तरता दिँदै प्रतिबन्धित अन्तरमहाद्वीपीय क्षेप्यास्त्रहरूको परीक्षण जारी राखेको बताइएको छ।
यद्यपि, शासन व्यवस्था अत्यन्त गोप्य रहने भएकाले सैन्य प्रगतिबारे बाह्य विश्वका लागि यथार्थ मूल्याङ्कन गर्न कठिन हुने विश्लेषकहरू बताउँछन्। सन् १९४० को दशकदेखि किम परिवारकै शासन चल्दै आएको उत्तर कोरियामा सन् २०११ मा पिताको निधनपछि किम जोङ उनले सत्ता सम्हालेका थिए। त्यसयता उनले आणविक हतियार कार्यक्रमलाई प्राथमिकतामा राख्दै लगानी बढाएका छन्, जसले विशेषगरी अमेरिका लगायत पश्चिमा मुलुकहरूसँगको सम्बन्धमा तनाव सिर्जना गरेको छ।
फेब्रुअरी १९ बाट सुरु भएको महाधिवेशन चौथो दिनमा प्रवेश गरेको छ। करिब ५,००० पार्टी सदस्यहरूको सहभागिता रहेको यस भेलालाई उत्तर कोरियाको सबैभन्दा महत्त्वपूर्ण राजनीतिक घटनामध्ये एक मानिन्छ। यसले विदेश नीति, रक्षा रणनीति र आर्थिक प्राथमिकताबारे संकेत दिने अपेक्षा गरिएको छ।
महाधिवेशन सुरु हुनुअघि आणविक क्षमता भएका रकेट लन्चरहरूको प्रदर्शनी गरिएको थियो। साथै, सन् २०२१ को बैठकपछि पार्टीको ‘प्रेसिडियम’ (कार्यकारी समिति) मा व्यापक हेरफेर गरिएको जनाइएको छ, जहाँ ३९ सदस्यमध्ये आधाभन्दा बढी सदस्य परिवर्तन गरिएका छन्।
गत साता उद्घाटन भाषणमा किमले देशको अर्थतन्त्र सुदृढ पार्ने र जनताको जीवनस्तर उकास्ने प्रतिबद्धता व्यक्त गरेका थिए। यसैबीच, दक्षिण कोरियाको गुप्तचर निकायले किमकी छोरी किम जु एलाई सम्भावित उत्तराधिकारीका रूपमा प्रस्तुत गरेको दाबी सार्वजनिक गरेको छ। करिब १३ वर्षकी मानिने जु ए पछिल्ला सरकारी कार्यक्रम तथा सैन्य गतिविधिहरूमा देखिन थालेकी छन्।
महाधिवेशनका निर्णयहरूले आगामी पाँच वर्षका लागि उत्तर कोरियाको नीति तथा रणनीतिक दिशा तय गर्ने अपेक्षा गरिएको छ।
