काठमाडौं । प्रतिनिधि सभा सदस्य निर्वाचन २०८२ का अवसरमा परेको सार्वजनिक बिदाका बीच पनि ग्राहकलाई आवश्यक बैंकिङ सेवा उपलब्ध गराउन एनआईसी एशिया बैंकले चयनित शाखा सञ्चालनमा राख्ने भएको छ। बैंकले जारी गरेको सूचनाअनुसार फागुन २० र २२ गते देशभरका विभिन्न शाखाबाट सीमित समयका लागि काउन्टर सेवा प्रदान गरिनेछ भने निर्वाचन हुने मुख्य दिन फागुन २१ गते सबै शाखा बन्द रहनेछन्।
बैंकका अनुसार निर्वाचनमा कर्मचारी तथा सेवाग्राहीले सहज रूपमा मतदान गर्न सकून् भन्ने उद्देश्यले फागुन २१ गते शाखा काउन्टर बन्द गरिनेछ। तर त्यसअघि र त्यसपछिका सार्वजनिक बिदा फागुन २० र २२ गते भने देशभरका चयनित शाखा खोलिनेछन्। अधिकांश शाखाहरू बिहान ११ बजेदेखि दिउँसो २ बजेसम्म सञ्चालनमा रहने बैंकले जनाएको छ।
बागमती प्रदेशको काठमाडौँस्थित न्युरोड खिचापोखरी शाखामा भने विशेष समय तालिका लागू गरिएको छ। सो शाखा दिउँसो २ बजेदेखि साँझ ५ बजेसम्म सञ्चालनमा रहनेछ। काठमाडौँको व्यापारिक गतिविधि बढी हुने क्षेत्र भएकाले ग्राहकको सुविधा ध्यानमा राख्दै यस्तो व्यवस्था गरिएको बैंकले जनाएको छ।
प्रदेशगत रूपमा हेर्दा कोशी प्रदेशमा विराटनगर, बिर्तामोड र दमक शाखाबाट सेवा उपलब्ध हुनेछ। मधेश प्रदेशमा जनकपुर र वीरगञ्ज शाखा सञ्चालनमा रहनेछन्।
बागमती प्रदेशमा भक्तपुर, पुल्चोक, कमलादी, न्युरोड खिचापोखरी, थानकोट र नारायणगढ शाखाबाट बैंकिङ सेवा लिन सकिनेछ। यी शाखाहरूले काठमाडौँ उपत्यका र आसपासका औद्योगिक तथा व्यापारिक क्षेत्रका ग्राहकलाई लक्षित गर्दै सेवा दिनेछन्।
गण्डकी प्रदेशमा पोखराको महेन्द्रपुल शाखा सञ्चालनमा रहनेछ। लुम्बिनी प्रदेशमा बुटवल र नेपालगञ्ज शाखाबाट सेवा प्रदान गरिनेछ। कर्णाली प्रदेशमा सुर्खेत शाखा खुला रहनेछ भने सुदूरपश्चिम प्रदेशमा धनगढी चौहारा शाखा सञ्चालनमा रहने बैंकले जनाएको छ।
बैंकका अनुसार निर्वाचन बिदाका समयमा पनि सीमित घण्टा काउन्टर सञ्चालन गर्दा नगद व्यवस्थापन सहज हुने, अत्यावश्यक कारोबार गर्न ग्राहकलाई सुविधा हुने तथा लामो बिदाका कारण हुने कारोबारको चाप कम गर्न सहयोग पुग्ने अपेक्षा गरिएको छ।
यसका साथै बैंकले मोबाइल बैंकिङ, इन्टरनेट बैंकिङ लगायत डिजिटल सेवा भने २४ घण्टा निरन्तर सञ्चालनमा रहने जानकारी दिएको छ। ग्राहकले आवश्यक भुक्तानी, रकम स्थानान्तरण तथा अन्य डिजिटल कारोबार सहज रूपमा गर्न सक्नेछन्।
बैंकले बिदाका दिनमा पनि सेवा सम्बन्धी जानकारी वा सहयोग आवश्यक परे ग्राहक सेवा केन्द्रमार्फत सम्पर्क गर्न आग्रह गरेको छ। ग्राहकहरूले ०१–५९७०१०१ नम्बरमा फोन वा [email protected] इमेलमार्फत जानकारी लिन सक्नेछन्।
निर्वाचनको राष्ट्रिय महत्त्वपूर्ण अवसरमा पनि चयनित शाखा सञ्चालन गरेर सेवा निरन्तरता दिने निर्णयले बैंकको ग्राहककेन्द्रित नीति र वित्तीय सेवा पहुँच विस्तारप्रतिको प्रतिबद्धता झल्काएको बताइएको छ।
