काठमाडौं । काठमाडौं महानगरपालिकाले पुतलीसडक–बागबजार–रत्नपार्क सडक खण्डमा टुकुचा खोला माथि बक्स कल्भर्ट निर्माण कार्य सुरु गरेको छ। यस परियोजनाले सो व्यस्त मार्गमा ढल तथा यातायात संरचना सुधार गर्ने उद्देश्य राखेको छ।
निर्माण हुने कल्भर्टको रोड तर्फको चौडाइ ५ मिटर र पानीको बहाव तर्फ १४ मिटर रहनेछ। निर्माण ठेक्का आर्काइभ स्टार निर्माण सेवा प्रा. लि. लाई दिइएको छ र चैतको अन्त्यसम्म कार्य सम्पन्न गर्ने सम्झौता गरिएको छ।
निर्माण अवधिभर सडक पूर्णरुपमा यातायात र पैदलयात्रीका लागि बन्द गरिएको छ। हाल पानीको बहाव व्यवस्थापनका लागि अस्थायी ह्याम्पाइप स्थापना गरिएको छ।
यातायात व्यवस्थापनको लागि विकल्प मार्ग तयार गरिएको छ। डिल्लीबजार–पुतलीसडक चोकबाट बागबजार तर्फ जाने सवारी साधन र रामशाह पथबाट बायाँ मोडेर पुतलीसडक–बागबजार तर्फ जाने सवारीका लागि वैकल्पिक मार्ग उपलब्ध गराइएको छ।
यस परियोजनाको कुल ठेक्का रकम रु ५७ लाख ७२ हजार ६९४ रहेको छ। महानगरले सडक र ढल सुधारका लागि यस परियोजना समयमै सम्पन्न हुने अपेक्षा राखेको छ।
