काठमाडौं। नेपालको तीव्र गतिमा विस्तार भइरहेको फुल्ली भिट्रिफाइड टायल ब्रान्ड लामिनारले काठमाडौं उपत्यकामा आफ्नो उपस्थिति थप मजबुत बनाउँदै भक्तपुर क्षेत्रमा दुई नयाँ शोरुम सञ्चालनमा ल्याएको छ। सानो ठिमीस्थित सियाराम ग्रुप र बिन्देश्वरी प्लानिङ क्षेत्र, भक्तपुरमा पञ्चदेवल सप्लायर्समार्फत यी शोरुम सञ्चालनमा आएका हुन्।
लामिनारले आठ वटा कलेक्सनअन्तर्गत ५५० भन्दा बढी डिजाइन (एसकेयू) सहित नेपालकै फराकिलो टायल संग्रह प्रस्तुत गरेको जनाएको छ। नयाँ शोरुमहरूमा आवासीय घर, होटल तथा आतिथ्य क्षेत्र र व्यावसायिक परियोजनाका लागि उपयुक्त पानी नसोस्ने तथा अभेद्य टायलहरू प्रदर्शनमा राखिएका छन्। ग्राहकहरूले यहाँ मार्बल शैलीका डिजाइन, आधुनिक ढुङ्गा बनावट तथा प्रिमियम पोलिस गरिएको सतहका टायलहरू अवलोकन तथा खरिद गर्न सक्नेछन्।
कम्पनीका अनुसार पोलिस्ड मार्बल तथा ओनिक्स श्रृंखलामा १०४ भन्दा बढी ग्लस युनिट भएको उच्च चमकदार सतह प्रयोग गरिएको छ, जसले ऐनाजस्तै चम्किलो प्रभाव दिन्छ। यस्तो सतह विशेष गरी लक्जरी भिला, होटल तथा बार जस्ता स्थानका लागि उपयुक्त मानिन्छ। गहिरो पोलिस स्पष्टतासहित तयार गरिएका यी टायलहरू प्रिमियम मार्बलको गुणस्तरसँग मेल खाने खालका छन्।
यसैगरी केही टायलहरूमा पिइआई५ घर्षण प्रतिरोध, मोस ९ (कडा तथा नकोरिने) गुण र आर१२ (नचिप्लने) सतह जस्ता विशेषता उपलब्ध छन्, जसले ती टायलहरूलाई बढी आवागमन हुने स्थानका लागि समेत उपयुक्त बनाएको छ।
उद्घाटन समारोहमा सियाराम ग्रुपका निर्देशक हरिश जाजोडिया अग्रवालले लामिनारको प्रविधि, डिजाइन र गुणस्तरले बजारमा विश्वास स्थापित गरेको बताए। उनले नयाँ शोरुममार्फत घरधनी, आर्किटेक्ट तथा डेभलपरहरूलाई टिकाउ टायल छनोट गर्ने थप अवसर प्राप्त हुने उल्लेख गरे।
त्यसैगरी पञ्चदेवल सप्लायर्सका निर्देशक उपेन्द्र शाहीले लामिनारका मार्बल शैलीका डिजाइन र पानी नसोस्ने प्रविधिले लक्जरी इन्टेरियरका लागि आकर्षक विकल्प प्रदान गरेको बताए। उनका अनुसार ग्राहकहरू अहिले सौन्दर्य र दीर्घकालीन टिकाउपन दुवैलाई प्राथमिकता दिने सतह खोजिरहेका छन्।
शोरुम उद्घाटन गर्दै लामिनारका निर्देशक अभिनव चुरीवालले कम्पनीको लक्ष्य नेपालमै उत्पादन हुने तर अन्तर्राष्ट्रिय स्तरसँग प्रतिस्पर्धा गर्न सक्ने उन्नत प्रविधियुक्त सतह उपलब्ध गराउनु रहेको बताए। बर्दियास्थित उच्च क्षमतायुक्त कारखानामा इटालीको ग्लेज तथा स्पेनको डिजिटल इन्क प्रविधि प्रयोग गरी उत्पादन भइरहेको उनले जानकारी दिए।
शोरुम सञ्जाल विस्तारसँगै लामिनारले देशभर आफ्नो बजार उपस्थिति अझ सुदृढ बनाउँदै लगेको छ। नेपालमै उत्पादन गरिएका विश्वस्तरीय गुणस्तरका भिट्रिफाइड टायलहरू विभिन्न सतह आवश्यकताअनुसार बजारमा उपलब्ध रहेको कम्पनीले जनाएको छ।
