काठमाडाैं । संयुक्त राष्ट्र संघका वरिष्ठ अधिकारीहरूले सिरियाले विश्वकै सबैभन्दा ठूलो विस्थापन संकटको सामना गरिरहेको बताएका छन् । दशक लामो द्वन्द्वका कारण देशको मानवीय अवस्था गम्भीर बन्दै गएको उनीहरूको भनाइ छ ।
संयुक्त राष्ट्र संघका अनुसार हाल सिरियामा करिब ५५ लाख मानिस विस्थापित भएका छन् भने १ करोड ३३ लाख मानिस खाद्य असुरक्षाको जोखिममा रहेका छन् । तीमध्ये ७२ लाख मानिसले खाद्यान्नको चरम अभाव झेलिरहेका छन् ।
बिहीबार आयोजित पत्रकार सम्मेलनमा मानवीय मामिला तथा आपतकालीन राहत संयोजक तथा संयुक्त राष्ट्र संघका उप–महासचिव टम फ्लेचर र संयुक्त राष्ट्र संघीय विकास कार्यक्रमका प्रशासक अलेक्जेन्डर डी क्रुले सिरियाली विदेश मामिला अधिकारी कुतैबा कादिससँगै अन्तर्राष्ट्रिय सहयोग बढाउन आह्वान गरेका छन् ।
फ्लेचरले पछिल्ला महिनाहरूमा केही सकारात्मक प्रगति भए पनि लामो युद्धका कारण मानवीय अवस्था अझै अत्यन्तै चुनौतीपूर्ण रहेको बताए । उनले विश्वभर सहायता कोषमा भइरहेको कटौतीले राहत कार्य प्रभावित भएकोमा पनि चिन्ता व्यक्त गरे ।
संयुक्त राष्ट्र संघको अनुमानअनुसार यस वर्ष सिरियामा १ करोड ५६ लाख मानिसलाई मानवीय सहायताको आवश्यकता छ । साथै, सन् २०२६ मा मात्र मानवीय प्रतिकार्यका लागि करिब २ अर्ब ९० करोड अमेरिकी डलर आवश्यक पर्ने अनुमान गरिएको छ ।
पत्रकार सम्मेलनअघि संयुक्त राष्ट्र संघका अधिकारीहरूले सिरियाका अन्तरिम नेता अहमद अल–शारा र विदेश प्रमुख असाद शैबानीसँग उच्चस्तरीय छलफल गरेका थिए । सो भेटवार्ता मानवीय सहायता र पुनर्निर्माण प्रयासको समन्वयमा केन्द्रित रहेको जनाइएको छ ।
