काठमाडौं । अमेरिकी राष्ट्रपति डोनाल्ड ट्रम्पले इरानलाई दिएको ४८ घण्टाको अन्तिम चेतावनीलाई इरानले ठाडै अस्वीकार गरेको छ । ट्रम्पले इरानलाई निर्धारित समयभित्र सम्झौता गर्न वा हर्मुज जलडमरूमध्य खोल्न चेतावनी दिँदै अन्यथा गम्भीर परिणाम भोग्नुपर्ने बताएका थिए ।
तर, इरानले उक्त चेतावनीलाई अस्वीकार गर्दै यसलाई “असहाय र त्रसित मानसिकताको उपज” भएको टिप्पणी गरेको छ । साथै, इरानले हालको परिस्थितिमा वार्ताको सम्भावनासमेत नकारेको जनाएको छ ।
युद्धको प्रभाव विस्तार हुँदै कुवेतसम्म पुगेको छ । कुवेतस्थित एक तेल प्रशोधन केन्द्रमा ड्रोन आक्रमण हुँदा भीषण आगलागी भएको छ । यद्यपि, कुवेत सरकारले उक्त घटनामा कुनै मानवीय क्षति नभएको पुष्टि गरेको छ ।
यता, इरानको महशहर पेट्रोकेमिकल क्षेत्रमा अमेरिका र इजरायलले गरेको संयुक्त आक्रमणमा ५ जनाको मृत्यु भएको छ भने १७० जना घाइते भएका छन् । युद्ध सुरु भएयता इरानका ३० भन्दा बढी विश्वविद्यालयहरू आक्रमणको निशानामा परिसकेको बताइएको छ ।
त्यस्तै, लेबनानमा पनि इजरायलको बमबारी जारी रहेको छ । दक्षिण लेबनानको मारकेह सहरमा भएको आक्रमणमा ५ जना सर्वसाधारणको ज्यान गएको छ । हिजबुल्लाहसँगको भिडन्तमा एक इजरायली सैनिकको समेत मृत्यु भएको जनाइएको छ ।
युद्धको विरोधमा इजरायलभित्रै जनआक्रोश बढ्दै गएको छ । तेल अभिभ, जेरुसेलम र हाइफा लगायतका सहरहरूमा सयौँ प्रदर्शनकारीहरू सडकमा उत्रिएका छन् । उनीहरूले तत्काल युद्ध अन्त्य गरी शान्तिको बाटो अपनाउन माग गरेका छन् ।
हालको अवस्थाले मध्यपूर्व क्षेत्रमा तनाव थप चुलिँदै गएको संकेत गरेको छ भने अन्तर्राष्ट्रिय समुदायले शान्ति र संयमताका लागि आह्वान गरिरहेको छ ।
