राष्ट्रिय स्वतन्त्र पार्टीका उपसभापति एवं सांसद डा. स्वर्णिम वाग्लेले दोस्रो स्टक एक्सचेन्जको अनुमति दिनुपर्ने भनी अर्थसमितिबाट गराइएको निर्णय प्रक्रियामा प्रश्न उठाउनुभएको छ ।
उहाले यो प्रक्रिया गलत रहेको भन्दै सरकार र नियामक बोर्डलाई जिम्मेवार हुन आग्रह गर्नुभएको हो ।
लामो समयदेखि अड्किँदै आएका नेप्से पुनर्संरचना र नयाँ स्टक एक्सचेन्जको लाइसेन्सका विषयमा आज बिहीबार अर्थसमितिमा छलफल भएको हो।
वाग्लेले भन्नुभयो, ‘२०८० साल कात्तिक २४ गते यो समितिले सर्वसम्मत रुपमा जुन निर्णय गर्यो, त्यसपछि लगभग मेरो मोहभंग भयो।’
त्यतिबेला आफूले नोट अफ डिसेन्ट लेखेको बताउँदै उनले समितिबाट सर्वसम्मत भएको निर्णयले आफ्नो सातो गएको र अहिलेसम्म नफर्केको उहाले जनाउनुभयो ।
‘यसका केही कारणहरु मैले त्यतिबेला पनि भनेको थिएँ, लेखेको थिएँ। त्यसको एक महिना अगाडि हामीले एउटा नीति संवाद गरेका थियौँ। अहिले त्यति चर्चामा हुनुहुन्न, हुन त अहिलेको सत्तारुढ दलकै आर्थिक सल्लाहकार हुनुहुन्छ क्यारे’, उहाँले भन्नुभयो, ‘तर अर्थशास्त्र बुझेको अनुभवी, पूर्वअर्थमन्त्री युवराज खतिवडाले यो दोस्रो स्टक एक्सचेन्जको गेमचाहिँ प्रिपेड करप्सन नै हो भनेर हाम्रो पार्टीको कार्यक्रममा भन्नुभएको थियो।’
नेपाल स्टक एक्सचेन्जको विकास र विस्तारको नारा लगाएको धेरै समय भए पनि त्यसमा कुनै कदम नचाली नयाँ स्टकलाई लाइसेन्स दिन खोज्नु गलत भएको वाग्लेको भनाइ थियो।
उहाँले ‘दूध दिइरहेको गाईलाई सखाप पारेर भ्रष्ट नेताहरूसँगको साँठगाँठ भएका व्यक्तिहरूलाई पोस्न लाइसेन्स दिन खोजिँदै छ। यो रवैया ठीक छैन।’ भन्नुभयो ।
वाग्लेले २०८४ को चुनावपछि आफूहरू सरकारमा आएमा यस्ता निर्णय सबै खारेज गरिने बताउनुभयो ।
