इरानको जेलबाट हालै रिहा भएका पाँच जना नेपाली नागरिक स्वदेश फर्किएका छन्।
परराष्ट्र मन्त्रालयका अनुसार इरानी अदालतले उनीहरूलाई रिहा गरेपछि बिहीबार काठमाडौं ल्याइएको हो। इरानस्थित नेपालका अवैतनिक महावाणिज्यदूत र अन्तर्राष्ट्रिय आप्रवासन संगठन (IOM) को समन्वयमा उनीहरूको उद्धार र पुनःस्थापना सम्भव भएको मन्त्रालयले जनाएको छ।
यद्यपि, मन्त्रालयले ती नेपालीहरूको पहिचान भने खुलाइएको छैन। यसअघि इरान–इजरायल तनावका बेला इरानमा फसेका ९ नेपालीलाई तीन चरणमा उद्धार गरी नेपाल फर्काइएको थियो। परराष्ट्र मन्त्रालयले संकटमा परेका नेपालीहरूको उद्धारलाई प्राथमिकताका साथ अगाडि बढाइरहेको जनाएको छ।
