संयुक्त राज्य अमेरिका र युरोपेली संघबीच एक निर्णायक व्यापार सम्झौता भएको छ, जसले दुई ठूला विश्व अर्थतन्त्रबीच चल्न सक्ने व्यापार युद्धलाई टारिदिएको छ। अमेरिकी राष्ट्रपति डोनाल्ड ट्रम्प र युरोपेली आयोगकी अध्यक्ष उर्सुला भोन डेर लायनबीच स्कटल्याण्डमा भएको उच्चस्तरीय वार्तापछि सो सहमति कायम भएको हो।
नयाँ सम्झौताअनुसार युरोपेली संघबाट अमेरिका आउने सबै वस्तुहरूमा अमेरिकी भन्सार शुल्क १५ प्रतिशतमा सीमित गरिएको छ। यसअघि ट्रम्प प्रशासनले युरोपेली उत्पादनहरूमा ५० प्रतिशतसम्मको भन्सार लगाउने चेतावनी दिएको थियो, जुन शुक्रबारदेखि लागू हुने भनिएको ३० प्रतिशतको आधा हो।
राष्ट्रपति ट्रम्पले युरोपेली संघसँगको सम्झौतामा अमेरिकाले पाउने फाइदाका रूपमा केहि उत्पादनहरूमा शून्य प्रतिशत भन्सार सुविधा पाउने बताएका छन्। उता, युरोपेली आयोग प्रमुख भोन डेर लायनले सम्झौतालाई ऐतिहासिक भनेकी छिन् र यसले स्थायित्व कायम गर्न महत्त्वपूर्ण योगदान पुर्याउने विश्वास व्यक्त गरेकी छिन्।
सम्झौताले व्यापार युद्धको जोखिम हटाइदिएपछि दुवै पक्षका उद्योगहरूमा सकारात्मक प्रतिक्रिया देखिएको छ। विशेषगरी हवाईजहाज, सेमिकन्डक्टर, सामान्य औषधि र केही कृषि उत्पादनहरूमा कर हटाइएपछि सम्बन्धित उद्योगहरूले सम्झौताप्रति स्वागत जनाएका छन्। यद्यपि मोटर गाडी उद्योग भने असन्तुष्ट देखिएको छ। सम्झौताअनुसार युरोपेली गाडीहरूमा अझै पनि १५ प्रतिशत भन्सार लाग्नेछ, जुन अमेरिकी बजारमा प्रतिस्पर्धात्मक असमानता ल्याउने आशंका गरिएको छ, किनभने अमेरिकाले मेक्सिकन गाडीहरूमा २५ प्रतिशत कर लगाइरहेको छ।
भोन डेर लायनले प्रारम्भिक सम्झौतामा औषधिजन्य वस्तुहरूलाई पनि समावेश गरिएको बताइन्, तर राष्ट्रपति ट्रम्पले त्यसमा फेरबदल गर्न सकिने संकेत दिएका छन्।
