नेपाली सिमेन्ट बजारमा आफ्नो उपस्थिति बलियो बनाउँदै लगेको भूगर्भ सिमेन्ट लिमिटेडले सन् २०२५ को पहिलो ९ महिनामा १ अर्ब १३ करोड ५० लाख रुपैयाँ बराबरको कारोबार गरेको छ । कम्पनीले लगातार व्यापार वृद्धि गर्दै आए पनि नाफामा भने केही उतारचढाव देखिएको छ ।
व्यापार वृद्धि र नाफाको अवस्था
कम्पनीले अघिल्ला वर्षहरूमा पनि सकारात्मक नतिजा देखाउँदै आएको छ । सन् २०२४ मा कम्पनीको वार्षिक कारोबार १ अर्ब ३९ करोड रुपैयाँ पुगेको थियो भने सन् २०२३ मा १ अर्ब २६ करोड ४० लाख रुपैयाँ बराबरको व्यापार गरेको थियो । कम्पनीका अनुसार सन् २०२३ को तुलनामा करिब १० प्रतिशत कारोबार वृद्धि भएको छ ।
यद्यपि, व्यापार वृद्धिसँगै नाफामा भने उतारचढाव देखिएको छ । सन् २०२४ मा क्लिंकरको मूल्य वृद्धि भएकाले नाफा घटेको कम्पनीले जनाएको छ । तर, व्यापार भने अघिल्लो वर्षकै स्तरमा कायम रहेको कम्पनीको भनाइ छ । सो अवधिमा कम्पनीले १३ करोड ७० लाख रुपैयाँ खुद नाफा कमाएको छ ।
उत्पादन क्षमता र विस्तार योजना
सन् २०२३ मा क्लिंकर उत्पादन नगरेको भूगर्भ सिमेन्टले सन् २०२४ मा पूर्ण क्षमतामा क्लिंकर उत्पादन थालेको थियो । हाल कम्पनीले दैनिक ३०० मेट्रिक टन क्लिंकर उत्पादन गरिरहेको छ । आगामी दिनमा उत्पादन क्षमता विस्तार गर्ने योजना कम्पनीको छ ।
बीसीएलले आफ्नै खानी योजना अन्तर्गत दैनिक ३२०० मेट्रिक टन प्रशोधन गर्ने क्षमताको व्यवस्था गरेको छ । कम्पनीले पोर्टल्यान्ड पोजोलाना सिमेन्ट (पीपीसी) र अर्डिनरी पोर्टल्यान्ड सिमेन्ट (ओपीसी) उत्पादन गर्दै आएको छ ।
स्थापना कालमा ५०० मेट्रिक टन प्रति दिन उत्पादन क्षमता रहेको कम्पनीले सन् २०२३ को अगस्टमा उक्त क्षमता बढाएर ७०० एमटीपिडी पुर्याएको थियो ।
क्रेडिट रेटिङ र सञ्चालन संरचना
भूगर्भ सिमेन्ट लिमिटेड प्रारम्भमा ‘भूगर्भ सिमेन्ट उद्योग प्रालि’ को नाममा दर्ता भई सञ्चालनमा आएको कम्पनी हो । यो सन् २०२४ मा सार्वजनिक लिमिटेड कम्पनीको रूपमा रूपान्तरण भई नयाँ चरणमा प्रवेश गरेको छ ।
कम्पनीले हाल २ अर्ब २५ करोड रुपैयाँ बराबरको ऋण सुविधा उपयोगका लागि क्रेडिट रेटिङ गराएको छ । यस अन्तर्गत दीर्घकालीन कर्जाका लागि १ अर्ब ४७ करोड १६ लाख रुपैयाँ र अल्पकालीन कर्जाका लागि ७७ करोड ८३ लाख रुपैयाँको रेटिङ गराइएको छ ।
कम्पनीमा हाल ५ जना सञ्चालक समिति सदस्य रहेका छन् । कार्यकारी प्रमुख कार्यकारी अधिकृत (सीईओ) मा दिपकराज गिरी र प्रबन्ध निर्देशकमा नन्दीकिशोर पौडेल रहेका छन् ।
नेपाली सिमेन्ट बजारमा प्रतिस्पर्धा तीव्र भइरहेको भए पनि भूगर्भ सिमेन्टले उत्पादन वृद्धि, गुणस्तरमा ध्यान र व्यावसायिक रणनीतिहरूको माध्यमबाट आफ्नो बजार हिस्सा विस्तार गर्दै गइरहेको छ ।
