उद्योग वाणिज्य महासंघका अध्यक्ष चन्द्र ढकालले निजी क्षेत्रबाट कोदोबाट बनेको परिकारहरुको प्रवद्र्धनका लागि आवश्यक सहयोग गर्ने प्रतिबद्धता जनाउनुभयो ।
आज शुक्रबार नेपाल कोदो, फापर संघले कोदो दिवसको अवसरमा आयोजित कार्यक्रममा बोल्दै उहाले निजी क्षेत्रबाट कोदोलाई प्रवद्र्धन गर्नका लागि र यसबाट बनेको परिकारहरुका बारेमा सचेतना जगाउनका लागि सरकार तथा अन्य संघ, संस्थाहरुसँग सहकार्य गरेर अगाडि बढ्ने बताउनुभयो ।
उहाँले भन्नुभयो,‘हामीले निजी क्षेत्रबाट कोदो र यसबाट बनेको परिकारहरुको प्रमोटको लागि सहकार्य गरेर अगाडि बढ्नेछौं ।’
त्यस्तै अध्यक्ष ढकालले गाउँतिर रहेका खेतीयोग्य जमिन बाँझो अवस्थामा रहेकामा चिन्ता व्यक्त गर्दै उक्त जमिनको सदुपयोग गरेर परम्परागत खेती कोदो–फापर जस्ता उत्पादनमा जोड दिनुपर्ने धारणा राख्नुभयो ।
उहाँले भन्नुभयो,‘हाम्रो गाउँतिर रहेको खेतीयोग्य जमिन बाँझो अवस्थामा छ । परम्परागत खेती कोदो–फापर उत्पादन भइराखेका बेला युवाहरु विदेशिने लहर चलेकाले खेतीमा कम ध्यान गएको छ । त्यसैले यसलाई प्रोमोट चाँही गर्नुपर्छ ।’
अध्यक्ष ढकालले आफू हरेक दिन विहानको खानाको रुपमा कोदो र फापरको रोटी खाने गरेको सुनाउनुभयो ।
