नेपालका जीवन बीमा कम्पनीहरूले अभिकर्ता कमिशनमा खर्च गर्ने रकम एक वर्षमै उल्लेख्य रुपमा बढाएका छन्। हालै सार्वजनिक आर्थिक वर्ष २०८१/८२ को चौथो त्रैमासिक वित्तीय विवरण अनुसार १४ ठूला जीवन बीमा कम्पनीहरूले जम्मा १४ अर्ब ८० करोड ७० लाख रुपैयाँ कमिशनमा खर्च गरेका छन्। अघिल्लो वर्ष सोही खर्च १२ अर्ब ९८ करोड ८ लाख रुपैयाँ मात्र थियो।
रकमको हिसाबले सबैभन्दा बढी नेपाल लाइफ इन्स्योरेन्स अगाडि छ। कम्पनीले अघिल्लो वर्षको तुलनामा १५.२५ प्रतिशतले खर्च बढाएर ३ अर्ब ६६ करोड ६८ लाख रुपैयाँ अभिकर्ता कमिशनमा खर्च गरेको विवरणमा उल्लेख छ।
दोस्रो स्थानमा नेशनल लाइफ इन्स्योरेन्स कम्पनी रहेको छ। यस कम्पनीले गत वर्ष २ अर्ब १८ करोड ४२ लाख रुपैयाँ कमिशन खर्च गरेको छ, जुन अघिल्लो वर्षको तुलनामा २९.४ प्रतिशतले वृद्धि हो। अघिल्लो वर्ष नेशनल लाइफले १ अर्ब ६८ करोड ७९ लाख रुपैयाँ मात्र खर्च गरेको थियो।
अन्य प्रमुख कम्पनीहरूमध्ये एलआइसी नेपालले १ अर्ब ४७ करोड ७४ लाख, हिमालयन लाइफले १ अर्ब ४६ करोड २९ लाख र सूर्यज्योति लाइफले १ अर्ब २ करोड २८ लाख रुपैयाँ खर्च गरेका छन्। यस्तै, सन नेपाल लाइफको खर्च ३०.३९ प्रतिशतले वृद्धि भई ४२ करोड ५५ लाख रुपैयाँ पुगेको छ, जुन वृद्धिदरका हिसाबले सबैभन्दा धेरै हो।
यसबाहेक एशियन लाइफले ८१ करोड ७ लाख, सिटिजन लाइफले ७२ करोड ५४ लाख, सानिमा रिलायन्सले ७१ करोड ८६ लाख, रिलायबल नेपाल लाइफले ५३ करोड ६२ लाख, प्रभू महालक्ष्मीले ५३ करोड ६ लाख, मेट लाइफले ५२ करोड ८० लाख, आइएमई लाइफले ५२ करोड ७३ लाख र राष्ट्रिय जीवन बीमाले १८ करोड ९९ लाख रुपैयाँ अभिकर्ता कमिशनमा खर्च गरेका छन्।
