जीवन बीमा कम्पनीहरूले दावी भुक्तानीमा उल्लेख्य वृद्धि गरेका छन्। आर्थिक वर्ष २०८१/८२ मा १४ ठूला जीवन बीमा कम्पनीहरूले साढे ७८ अर्ब रुपैयाँभन्दा बढी दावी भुक्तानी गरेका छन्। हालै प्रकाशित चौथो त्रैमासिक वित्तीय विवरण अनुसार यो अघिल्लो वर्षको तुलनामा करिब १९.२ प्रतिशत वृद्धि हो।
गत वर्ष कम्पनीहरूले ७८ अर्ब ७२ करोड १ लाख रुपैयाँ दावी भुक्तानी गरेका थिए। अघिल्लो वर्षको सोही अवधिमा भने ६६ अर्ब ४ करोड २१ लाख रुपैयाँ मात्र भुक्तानी गरिएको थियो। यसरी दोहोरो अंकले वृद्धि भए पनि अझै करिब ६ अर्ब ७७ करोड रुपैयाँ भुक्तानी हुन बाँकी रहेको विवरणले देखाएको छ।
सबैभन्दा धेरै दावी भुक्तानी नेपाल लाइफ इन्स्योरेन्सले गरेको छ। कम्पनीले गत वर्ष १९ अर्ब १९ करोड ६४ लाख रुपैयाँ भुक्तानी गरेको छ, जुन अघिल्लो वर्षको तुलनामा २८.०१ प्रतिशत धेरै हो। दोस्रोमा एलआइसी नेपाल रहेको छ, जसले १२ अर्ब ५९ करोड २ लाख रुपैयाँ भुक्तानी गरेको छ। अघिल्लो वर्ष यसले १० अर्ब ८९ करोड रुपैयाँ मात्रै दिएको थियो।
नेशनल लाइफ इन्स्योरेन्सको दावी भुक्तानी ३२.९४ प्रतिशतले बढेर ११ अर्ब ७ करोड १२ लाख रुपैयाँ पुगेको छ। एशियन लाइफले पनि ३२.६ प्रतिशत वृद्धि गर्दै ६ अर्ब १८ करोड ८९ लाख रुपैयाँ भुक्तानी गरेको छ।
अन्य कम्पनीहरूमध्ये हिमालयन लाइफले ७ अर्ब ३३ करोड ८५ लाख, राष्ट्रिय जीवन बीमाले ६ अर्ब ५६ करोड, सूर्यज्योतिले ३ अर्ब ६९ करोड, मेट लाइफले १ अर्ब ९१ करोड, सानिमा रिलायन्सले १ अर्ब ७७ करोड, सन नेपालले १ अर्ब ५७ करोड, रिलायवल नेपालले १ अर्ब ४३ करोड, आइएमई लाइफले १ अर्ब २८ करोड र प्रभू महालक्ष्मी लाइफले १ अर्ब १५ करोड रुपैयाँ दावी भुक्तानी गरेका छन्।
तर, दावी भुक्तानीसँगै भुक्तानी हुन बाँकी रकम पनि ठूलो मात्रामा बढेको छ। एकै वर्षमा बाँकी दावी रकम ५४.८९ प्रतिशतले बढेर ६ अर्ब ७७ करोड ५५ लाख रुपैयाँ पुगेको छ। अघिल्लो वर्ष यस शीर्षकमा ४ अर्ब ३७ करोड ४३ लाख रुपैयाँ मात्र बाँकी थियो।
विवरणअनुसार सबैभन्दा बढी बाँकी दावी रकम नेशनल लाइफको छ। कम्पनीको २ अर्ब ५१ लाख रुपैयाँभन्दा बढी भुक्तानी हुन बाँकी छ। दोस्रो धेरै नेपाल लाइफको छ, जसको २ अर्ब २ करोड २४ लाख रुपैयाँ बाँकी छ।
यस्तै, एलआइसी नेपालको ९९ करोड २७ लाख, सानिमा रिलायन्सको ४१ करोड ६४ लाख, सिटिजन लाइफको १२ करोड ४८ लाख, एशियन लाइफको ७ करोड १८ लाख, सन नेपालको २ करोड ६ लाख र प्रभू महालक्ष्मीको १ करोड ९० लाख रुपैयाँ भुक्तानी हुन बाँकी देखिन्छ।
तर, सबै कम्पनीमा बाँकी रकम बढेको भने छैन। रिलायवल नेपाल, मेट लाइफ, हिमालयन लाइफ र आइएमई लाइफको बाँकी दावी रकम घटेको देखिन्छ। विशेषगरी रिलायवल नेपाल लाइफको बाँकी दावी ३३.०९ प्रतिशत घटेर ३ करोड ४ लाख रुपैयाँमा झरेको छ।
