नेपालका ठूला निर्जीवन बीमा कम्पनीहरूले साउन महिनामा साढे ४ अर्ब रुपैयाँ बराबरको व्यवसाय आर्जन गरेका छन्। नेपाल बीमा प्राधिकरणले उपलब्ध गराएको तथ्याङ्क अनुसार, चालु आर्थिक वर्ष २०८१–८२ को पहिलो महिना साउनमा कुल २ लाख १५ हजार २८५ वटा बीमालेख बिक्री भएको थियो।
व्यवसायको आकारका आधारमा सगरमाथा लुम्बिनी इन्स्योरेन्स कम्पनी (सलिको) पहिलो स्थानमा छ। सलिकोले साउनमा ४५ करोड ५४ लाख रुपैयाँ बराबरको बीमा शुल्क आर्जन गरेको छ भने २१ हजार १५१ बीमालेख बिक्री गरेको छ।
दोस्रो स्थानमा रहेको सिद्धार्थ प्रिमियर इन्स्योरेन्सले ४१ करोड ७९ लाख ७४ हजार रुपैयाँ बराबरको बीमा शुल्क आर्जन गरेको छ। कम्पनीले साउनमा २२ हजार ५०३ बीमालेख बिक्री गरेको तथ्यांक प्राधिकरणले जनाएको छ।
तेस्रो स्थानमा शिखर इन्स्योरेन्स रहेको छ। शिखरले साउनमा ४१ करोड ५५ लाख ११ हजार रुपैयाँ बराबरको व्यवसाय गरेको छ भने २५ हजार २३७ बीमालेख बिक्री भएको छ।
अन्य कम्पनीहरूको व्यवसाय पनि उल्लेखनीय देखिएको छ। ओरियण्टलले ४१ करोड ३७ लाख २३ हजार, हिमालयन एभरेष्टले ३६ करोड ५२ लाख ४५ हजार, एनएलजीले ३४ करोड ३१ लाख २० हजार, आइजीआई प्रुडेन्सियलले ३३ करोड ८१ लाख ९० हजार, नेकोले ३२ करोड १ लाख रुपैयाँ बीमा शुल्क आर्जन गरेको छ। यी कम्पनीहरूले क्रमशः ३ हजार ८७९, २१ हजार ७५७, १५ हजार ७५८, १५ हजार ९४३ र २१ हजार ६९३ बीमालेख बिक्री गरेका छन्।
साउन महिनामा युनाईटड अजोडले २९ करोड ६७ लाख, नेपाल इन्स्योरेन्सले २३ करोड ६ लाख, सानिमा जिआइसीले २२ करोड ३६ लाख, नेपाल इन्स्योरेन्सले २० करोड ७१ लाख, राष्ट्रिय बीमा कम्पनीले १६ करोड २७ लाख र प्रभू इन्स्योरेन्सले १२ करोड ७१ लाख रुपैयाँ बराबरको बीमा शुल्क आर्जन गरेको तथ्यांक प्राधिकरणले देखाएको छ।
