पहिले केवल सामाजिक सञ्जालमै सीमित देखिएको असन्तोष अहिले सडकमा उत्रिएको छ। नेपालका जेन जेड पुस्ताले काठमाडौंको माइतीघर मण्डलाबाट सुरु भएको शान्तिपूर्ण आन्दोलनमार्फत भ्रष्टाचार, कुप्रबन्ध र सरकारले सामाजिक सञ्जालमा लगाएको प्रतिबन्धविरुद्ध आवाज बुलन्द गरेका छन्।
आन्दोलनमा सहभागी युवाहरूले राष्ट्रिय झण्डा बोके, देशभक्तिपूर्ण गीत गाए र ‘जनताको असन्तोष चरममा, नेताहरूको पेट भरिएको छ,’ ‘जेन जेडको गर्जन, भ्रष्टाचारको व्यंग्य,’ ‘कर कहाँ गयो?,’ ‘स्वतन्त्र आवाज हाम्रो अधिकार,’ र ‘भ्रष्टाचार बन्द गर’ भन्ने नारासहितका प्लेकार्ड प्रर्दशन गरे।
स्कूल र कलेजको पोशाकमै आएका विद्यार्थीहरूको सहभागिताले आन्दोलनलाई अझ विशेष बनाएको छ। आयोजकहरूले राजनीतिक दलका नेता वा सम्बद्ध समूहलाई प्रदर्शनमा प्रवेश नपाउने स्पष्ट गरेका छन्, जसले आन्दोलनलाई स्वतन्त्र, निष्पक्ष र जनकेन्द्रित देखाएको छ।
आन्दोलनमा सहभागी युवाहरूले अनुशासित रहन प्रतिज्ञा गरेका छन्—रुख तथा सार्वजनिक सम्पत्ति जोगाउने, तोडफोड नगर्ने, धम्की नदिने र नागरिक अधिकारको सम्मान गर्ने।
काठमाडौंमा सर्वाधिक भीड देखिए पनि रुपन्देही, दाङ लगायतका जिल्लाहरूमा पनि जेन जेड नेतृत्वको प्रदर्शन सुरु भइसकेको छ, जसले आन्दोलनलाई देशव्यापी स्वरूप दिएको छ।
स्वतन्त्र युवा, व्यवसायी, कलाकारदेखि केही राजनीतिक प्रतिनिधिसमेतले आन्दोलनको स्वतन्त्र चरित्रलाई सम्मान गर्दै समर्थन जनाएका छन्। विश्लेषकहरूका अनुसार यो आन्दोलनले सामाजिक सञ्जालमा सीमित युवाको असन्तोषलाई सडकसम्म ल्याउँदै मुलुकको राजनीतिक चेतनामा नयाँ मोड दिएको छ।
आयोजकहरूले आन्दोलनसम्बन्धी अपडेट टिकटक र भाइबरमार्फत पछ्याउन सहभागीहरूलाई आग्रह गरेका छन्।
