चालु आर्थिक वर्षको पहिलो पाँच महिनामा अधिकांश वाणिज्य बैंकहरूले कर्मचारी सेवा–सुविधामा गर्ने खर्च उल्लेख्य रूपमा बढाएका छन्। उपलब्ध तथ्याङ्क अनुसार यस अवधिमा वाणिज्य बैंकहरूको समग्र कर्मचारी खर्च ६.८२ प्रतिशतले वृद्धि भएको छ, जसले बैंकिङ क्षेत्रमा मानव स्रोतप्रति बढ्दो प्राथमिकता देखाएको छ।
अघिल्लो वर्षको सोही अवधिको तुलनामा २० वाणिज्य बैंकमध्ये १७ वटाले कर्मचारी खर्च बढाएका छन् भने ३ वटा बैंकमा मात्र खर्च घटेको छ। केही बैंकहरूले त कर्मचारीको तलब तथा सुविधामा ४१ प्रतिशतसम्म वृद्धि गरेका छन्।
मंसिर मसान्तसम्म बैंकहरूले कर्मचारीको तलब तथा सुविधामा कुल २५ अर्ब ४ करोड १५ लाख ८० हजार रुपैयाँ खर्च गरेका छन्। यो रकम गत वर्षको मंसिरसम्मको २३ अर्ब ४४ करोड ३२ लाख १० हजार रुपैयाँको तुलनामा १ अर्ब ५९ करोड ८३ लाख ७० हजार रुपैयाँले बढी हो।
खर्च वृद्धिमा एनएमबि बैंक अग्रस्थानमा
कर्मचारी खर्च सबैभन्दा धेरै प्रतिशतले बढाउने बैंकको सूचीमा एनएमबि बैंक अग्रस्थानमा देखिएको छ। बैंकले अघिल्लो वर्षको तुलनामा कर्मचारी खर्च ४१.६३ प्रतिशतले बढाएर १ अर्ब ३० करोड ८४ लाख ८० हजार रुपैयाँ पुर्याएको छ। अघिल्लो वर्ष सोही अवधिमा बैंकको कर्मचारी खर्च ९२ करोड ३९ लाख रुपैयाँ थियो।
दोस्रो स्थानमा रहेको सिटिजन्स बैंक इन्टरनेशनलले कर्मचारी खर्च ३०.२३ प्रतिशतले बढाएर ८९ करोड ६७ लाख ९० हजार रुपैयाँ पुर्याएको छ। त्यसैगरी नेपाल एसबिआई बैंकले १५.२४ प्रतिशत, नेपाल बैंकले १२.५९ प्रतिशत, ग्लोबल आइएमई बैंकले ११.३२ प्रतिशत र एभरेष्ट बैंकले १०.९६ प्रतिशतले कर्मचारी खर्च वृद्धि गरेका छन्।
रकमको आधारमा राष्ट्रिय वाणिज्य बैंक अगाडि
रकमको आधारमा हेर्दा राष्ट्रिय वाणिज्य बैंक कर्मचारी खर्चमा सबैभन्दा अगाडि देखिएको छ। बैंकले मंसिरसम्म कर्मचारी सुविधा शीर्षकमा १ अर्ब ९७ करोड ८९ लाख ४० हजार रुपैयाँ खर्च गरेको छ, जुन अघिल्लो वर्षको तुलनामा ७.४५ प्रतिशत बढी हो।
त्यस्तै नबिल बैंकले ९.१६ प्रतिशत वृद्धि गर्दै १ अर्ब ७४ करोड ८८ लाख ८० हजार रुपैयाँ खर्च गरेको छ। हिमालयन बैंकको खर्च ९.२२ प्रतिशतले बढेर १ अर्ब ३० करोड ५८ लाख ८० हजार रुपैयाँ, लक्ष्मी सनराइज बैंकको ६.१९ प्रतिशतले बढेर १ अर्ब ६७ करोड १९ लाख ३० हजार रुपैयाँ पुगेको छ।
यसैगरी सिद्धार्थ बैंक, माछापुच्छ्रे बैंक, प्रभु बैंक, कृषि विकास बैंक, प्राइम कमर्सियल बैंक, नेपाल इन्भेष्टमेन्ट मेगा बैंक र सानिमा बैंकले पनि विभिन्न दरमा कर्मचारी खर्च वृद्धि गरेका छन्। यीमध्ये सानिमा बैंकको खर्च वृद्धिदर सबैभन्दा कम ०.५५ प्रतिशत रहेको छ।
तीन बैंकमा खर्च संकुचन
यद्यपि, यस अवधिमा तीनवटा बैंकको कर्मचारी खर्चमा भने गिरावट आएको छ। एनआइसी एशिया बैंकको कर्मचारी खर्च सबैभन्दा धेरै १४.२१ प्रतिशतले घटेर १ अर्ब २३ करोड ३ लाख १० हजार रुपैयाँमा झरेको छ। त्यसैगरी स्ट्याण्डर्ड चार्टर्ड बैंकको खर्च ९.२३ प्रतिशत र कुमारी बैंकको खर्च २.५४ प्रतिशतले घटेको छ।
