वरिष्ठ पत्रकार राजेन्द्र बानियाले फाल्गुण २१ को निर्वाचनलाई केन्द्रमा राखेर सुरु गरिएको “प्रश्न सोधौँ” अभियानलाई औपचारिक रूपमा परिचय दिएका छन्। उनका अनुसार यो अभियान कुनै दल विरोधी अभियान होइन, बरु उम्मेदवार र नेताहरूलाई जिम्मेवार बनाउने माध्यम हो।
बानियाले सबै नागरिकलाई आग्रह गरेका छन् कि जहाँ नेता वा उम्मेदवार भेटिन्छन्, त्यहीँ उनीहरूलाई प्रश्न सोध्नुपर्छ। अभियानको आजको केन्द्रविन्दु एमाले अध्यक्ष तथा पूर्वप्रधानमन्त्री केपी शर्मा ओली हुन्।
उनीहरूसँग उठाइएका प्रमुख प्रश्नहरूमा समावेश छन्:
-
भाद्र २३ को नरसंहार पछि पनि जनतामा गएर राजनीति गर्ने नैतिकता छ कि छैन?
-
२०७४ को दुई तिहाई र २०८१/८२ को झण्डै दुई तिहाई संसदीय बहुमत आफ्नो दम्भ नाप्न बाहेक प्रयोग नभएपछि फेरि किन भोट दिने?
-
लोकतन्त्रको आवरणमा जन्मिएको निरंकुश शासकको छवि तपाईंको, पार्टीभित्र र बाहिर सबै वाक्क छन्, यस्तो अवस्थामा भद्र ढंगले जिम्मेवारी लिनुहुन्छ कि?
-
तपाईं र तपाईंका निकटका कतिपयको अनुहारमा विभिन्न काण्डको छाप छ, न छानबिन हुन दिइयो न सार्वजनिक परिक्षण गर्नुभयो, यो निर्लज्जताको पराकाष्ठा होइन र?
-
३६ वर्षमा तपाईं र तपाईंका करामत देखिइसक्यो, कम्तिमा नेपाली जनतालाई तपाईंहरूको अनुहार र हर्कतबाट मुक्त गरिदिनुहुन्छ कि?
पत्रकार बानियाले थप सभ्य, तथ्यपरक र नेताहरूलाई चुनौती दिने प्रश्नहरू अभियानमा समावेश गर्न आम नागरिकलाई आमन्त्रित गरेका छन्। अभियानले जनताका लागि जिम्मेवार राजनीति र पारदर्शिता सुनिश्चित गर्ने उद्देश्य राखेको छ।
