बजारमा खाना पकाउने ग्यासको अभाव र खाने तेलको अस्वाभाविक मूल्यवृद्धि हुन थालेपछि वाणिज्य, आपूर्ति तथा उपभोक्ता संरक्षण विभागले आफ्नो गम्भीर ध्यानाकर्षण भएको जनाएको छ। उपभोक्ताबाट बढेका गुनासोका कारण विभागले बजार अनुगमन र आपूर्ति शृङ्खलाको विश्लेषणलाई तीव्र बनाएको छ।
विभागका निर्देशक नरहरि तिवारीले हालको समस्याबारे विभागले सुक्ष्म अध्ययन गरिरहेको जानकारी दिए। उनका अनुसार मुलुकभित्र बाटोघाटोमा अवरोध वा कुनै ठुलो विपद् नभए पनि आपूर्तिमा समस्या देखिनुको कारण अन्तर्राष्ट्रिय बजार र अमेरिकी डलरको मूल्यवृद्धि हुनसक्ने प्रारम्भिक अनुमान छ।
निर्देशक तिवारीले बताएअनुसार अमेरिकी डलरको भाउ १४८ रुपैयाँसम्म पुगेको छ भने अन्तर्राष्ट्रिय व्यापारमा देखिएका नीतिगत परिवर्तन (ट्रेड वार र ट्यारिफ) का कारण आपूर्ति शृङ्खलामा समस्या देखिएको हुनसक्छ। “अहिले आन्तरिक कारणले सामान रोकिनुपर्ने अवस्था छैन,” उनले भने। तर भन्सारको तथ्याङ्क अनुसार अघिल्लो वर्षको तुलनामा ग्यास आयातमा केही कमी देखिएको छ भने भारतमा पनि केही प्राविधिक समस्या भएको जानकारी प्राप्त भएको छ।
विभागले बजारमा कृत्रिम अभाव सिर्जना गर्ने व्यापारी वा व्यवसायीहरूलाई कडा चेतावनी दिएको छ। निर्देशक तिवारीले स्पष्ट पारे, “यदि कसैले आपूर्तिमा अवरोध गर्ने, कार्टेलिङ गर्ने वा अस्वाभाविक मूल्य वृद्धि गरेर उपभोक्ता ठग्ने काम गरेमा हामी कानुन बमोजिम तत्काल कारबाही गर्छौं।”
साथै, विभागले उपभोक्ताहरूलाई पनि आग्रह गरेको छ कि बजारमा अस्वाभाविक मूल्यवृद्धि वा अभाव देखिएमा तुरुन्त उजुरी गर्न।
विभागको सक्रिय निगरानी र चेतावनीले बजार स्थिरता कायम राख्ने प्रयासलाई बल दिने अपेक्षा गरिएको छ।
