काठमाडौं । विश्व बाल दिवसको अवसर पारेर गोल्याण ग्रुपले जेन–जी सहिद परिवारका बालबालिकालाई समेटेर ‘किड्स प्ले–डेट’ कार्यक्रम आयोजना गरेको छ। धुम्बाराहीस्थित ऊप्स नेपाल फनपार्कमा भएको कार्यक्रममा बालबालिका र उनीहरूको अभिभावक उत्साहपूर्वक सहभागी भएका थिए।
गोल्याण ग्रुपले यसअघि असोज २४ गते सहिद परिवारका बालबालिकाका लागि कक्षा १२ सम्मको पूर्ण शैक्षिक सहयोग प्रदान गर्ने घोषणा गरिसकेको छ। हालसम्म २७ बालबालिकासँग शैक्षिक खर्च व्यहोर्ने सहमति भइसकेको र आगामी दिनमा विद्यालय, अभिभावक र समूहबीच त्रिपक्षीय सम्झौता प्रक्रिया अघि बढिरहेको जानकारी दिइएको छ।
बिहीबारको प्ले-डेट कार्यक्रम शैक्षिक वृत्ति योजनामा समावेश भएका काठमाडौंका बालबालिका र उनका अभिभावकबीच आत्मीयता र संवाद बढाउने उद्देश्यले आयोजना गरिएको थियो। बालबालिकाले फनपार्कमा विभिन्न रमाइला खेल, मानसिक चाप कम गर्ने गतिविधि तथा समूहगत खेलकुदमा सहभागी भएर खुसी अनुभव गरेका थिए।
कार्यक्रममा गोल्याण ग्रुपका प्रबन्ध निर्देशक अक्षय गोल्याणले ‘नयाँ परिवार’ का सदस्यबीच न्यानो सम्बन्ध र सहकार्यको वातावरण बनाउनु समूहको मुख्य लक्ष्य रहेको बताए। “हामी प्रत्येक बालबालिकालाई सम्मान, संरक्षण र अवसर दिलाउने संकल्पसहित अघि बढिरहेका छौँ,” उनले भने, “बालबालिकाको अधिकार सुरक्षित हुँदा मात्र समृद्ध राष्ट्रको यात्रा सम्भव हुन्छ।”
त्यसैगरी, गोल्याण ग्रुपकी कर्पोरेट अफेयर्स तथा कम्युनिकेशन प्रमुख ज्योति गैह्रेले विश्व बाल दिवसले बालबालिकाप्रति जिम्मेवारी सम्झाउने अवसर भएको बताउनु भयाे । “बालबालिकाको खुसीभित्र उनीहरूको विकास, आत्मविश्वास र भविष्य लुकेको हुन्छ,” उनले भनिन्, “आजको प्ले-डेट त्यसैको प्रतीक हो।”
गोल्याण ग्रुपले सहिद परिवारका बालबालिकाको शिक्षादेखि मनो-सामाजिक विकाससम्म साथ दिने लक्ष्य राखेको छ। कार्यक्रमका सहभागीसहित समूहका प्रतिनिधिले यस्ता अभियानले बालबालिकाको भविष्य निर्माणमा सकारात्मक प्रभाव पार्ने विश्वास व्यक्त गरेका छन्।
