नेपाली कांग्रेसभित्र हाल महाधिवेशन गर्ने कि विशेष महाधिवेशन गर्ने भन्ने विषयमा परेको रस्साकस्सी, लामो समयसम्मको केन्द्रीय समितिको बैठकको अनिश्चितता र पार्टीभित्र उत्पन्न भएको अवस्थाले सर्वसाधारणमा समेत चिन्ता बढाएको छ। यस्तो संवेदनशील परिस्थितिमा नेपाली कांग्रेसका शुभेच्छुक, लोकतन्त्रप्रेमी र पार्टीले बहुमत प्राप्त गरोस् भन्ने हार्दिक चाहना राख्ने व्यक्तिको हैसियतले यो सुझाव प्रस्तुत गरिएको छ।
गएको भदौ २३ र २४ गतेका अप्रत्याशित र डरलाग्दो बीद्रोह र राजनीतिक घटनाक्रमबाट प्रधानमन्त्री नियुक्ति त भएको छ, तर त्यो प्रक्रिया संविधानको कुनै पनि स्पष्ट धारामा आधारित छैन। यसले संविधानको धारलाई बाङ्गो पार्ने, भ्रम सिर्जना गर्ने र संवैधानिक मर्यादामा गम्भीर प्रश्न उठाउने अवस्था बनाएको छ। यस्तो संवैधानिक अस्पष्टतालाई हटाई देशलाई स्थिर मार्गमा फर्काउन छ महिनाभित्र आम निर्वाचन गरिने सम्भावना सहित देशलाई सुशासन, शान्ति र स्थिरतामा फर्काउने प्रमुख जिम्मेवारी नेपाली कांग्रेसकै काँधमा आउँछ।
यस्तो संकटपूर्ण घडीमा पार्टीभित्र हुने आन्तरिक निर्वाचनमा होमिने कि राष्ट्रको हितमा लाग्दै आम जनतामा भएको निराशामा आसाको किरण देखाउदै आम निर्वाचनलाई प्राथमिकता दिने भन्ने विषयमा गम्भीर बहस हुनुपर्ने देखिन्छ। राष्ट्र र संविधान कठिनाइमा परेका बेला हाम्रो पहिलो प्राथमिकता देशकै स्थिरता, संविधानको मर्यादा र आम निर्वाचन तयारी हुनुपर्छ भन्ने निष्कर्ष स्वाभाविक रूपमा अगाडि आउँछ।
यदि यस्तो अवस्थामा तुरुन्तै आन्तरिक नेतृत्व चयन गर्नै परे, विशेष महाधिवेशन नै उपयुक्त माध्यम हुन्छ। यसले सभापति, पदाधिकारी र केन्द्रीय समिति सदस्यको चयन सिधै केन्द्रीय स्तरमै सीमित गर्छ। जसले वडादेखि प्रदेशसम्म संगठनलाई अनावश्यक झगडा, रिसइबी र विभाजनमा लग्ने अवस्था पनि कम हुन्छ।
यसको विपरीत, २०८२ पुस–माघमा हुने नियमित महाधिवेशन वडा, क्षेत्र, प्रदेश हुँदै केन्द्रसम्म फैलिनु पर्दा धेरै कार्यकर्तालाई समेट्न नसक्ने सम्भावना हुन्छ। त्यस्तो विभाजन र असन्तुष्टि २०८२ फागुन २१ गते हुने आम निर्वाचनमा प्रत्यक्ष असर पार्न सक्छ। मन चिरिएका साथीहरूलाई सम्हाल्ने, एकताबद्ध बनाउने र मलम लगाउने समय समेत पार्टीसँग पर्याप्त नहुन सक्छ।
त्यसैले,यदि तत्काल नेतृत्व चयन गर्नै परे विशेष महाधिवेशनबाटै सभापति, पदाधिकारी छान्नु नै उत्तम विकल्प हो। यदि नियमित महाधिवेशन गर्नुपर्छ भने आम निर्वाचनअघि नगरी २०८३ वैशाखतिर मात्रै गर्नु बुद्धिमानी निर्णय हुन्छ।
आन्तरिक नेतृत्व कब्जा गर्ने उद्देश्यले जल्दबाजीमा महाधिवेशन गर्ने प्रवृत्तिले पार्टीलाई आगामी आम निर्वाचनमा कमजोर बनाउने सम्भावना धेरै छ। राष्ट्रिय निर्वाचनमा विजय हासिल गर्नु छ भने अहिले आन्तरिक विवाद होइन, राष्ट्रको आवश्यकता र संविधानको रक्षा नै पहिलो प्राथमिकता बन्नुपर्छ।
जय नेपाल।
लेखक नेपालि कांग्रेसका नेता रबिन्स शर्मा शिक्षाछेत्रका ज्ञाता समेत हुन् । उनि मुलुकको हितमा चिन्तन गर्ने व्यक्तिको रुपमा परिचित छन् ।
र यो पनि
भिडियोको लागि लिंकमा क्लिक गर्नुहोला
